Den e fin di siman di 26 y 27 di Augustus lo bay tin e di 9 Costa Rica Open y ta un G1 ranking y 4 atleta di e team di Train Hard Fight Smart lo representa nan bandera na grandi.
Rasheed Lowe ta bay bringa den e categoria di cadet di -31kilo, mientras cu su ruman Hakeem Lowe ta bay bringa den e categoria di junior -51kilo. Jourdé Klabér ta bay bringa den e categoria di junior di -59 kilo y su ruman Záhyon Klabér ta bay bringa den e categoria di junior di -63 kilo. E team di Train Hard Fight Smart tin un bon preparacion tras di lomba, nan a haya dos camp training, uno for di Russell Beneby y otro for di ex campeon Mundial y Hall of Famer Henk Meijer. Nan a biaha bin Aruba specialmente pa esaki. Henk Meijer ta monitor e team aki hopi di cerca, pasobra e tin interes grandi pa nos team di Train Hard Fight Smart. E Mexicano Carlos Rangel ta bay coach e team di Train Hard Fight Smart na Costa Rica Open.
E Costa Rica Open lo bay ta e evaluacion di nos atletanan pa nan preparacion pa e President’s Cup na Portland cu ta un G2 y tambe e clasificasion pa e Pan Americano na 2017 y e Campeonato Mundial na luna di November na Canada, unda cu Hakeem Lowe, Záhyon Klabér y Jourdé Klabér ta ariba e lista pa esaki. Diahuebs awor e team lo sali rumbo pa Costa Rica y e registracion lo tuma lugar diabierna pa asina cuminsa bringa diasabra y diadomingo.