Fundacion Movemiento Ta Bida ta fungi como sede di RAFA pa Aruba invocando actividadnan specifico den area di promove experticio specifico (deskundigheidsbevordering),conseho riba di estilo di bida (life style), desaroyo y implementacion di programanan di actividad fisico y ehercisio, como tambe cooperacion den investigacion cientifico.
A logra pa Dr Christian Mejia bira miembro activo di e comite di iInvestigacion di RAFA-PANA. Esaki ta un cooperacion di 6 pais, consistiendo di: Aruba, Chile, Colombia, Cuba, Puerto Rico, y Republica Dominicana. Tambe lo traha hopi estrecho cu Puerto Rico na unda lo forma un aliansa pa e parti di capacitacion.Un otro punto di importancia tabata e tema di dia mundial di actividad fisico pa 2017, cu ta:” persona activo, persona feliz.”
Presidente di Fundacion Movemiento Ta Bida, Sr. Rudy Leysner a forma parti di e comité Capacitacion y Sra. Frances Figaroa a participa den e comité Abogacia.
Comité di Investigacion di RAFA-PANA a reconoce obesidad infantil como un menasa grandi pa salud publico na nivel mundial. Den tur pais miembro di RAFA-PANA ta observa un aumento di aparicion di malesanan cronico no-infeccioso na edadnan cada bes mas jong, lo cual te reduci e expectativa di bida di e generacionnan venidero. Adicionalmente e aumento di malesanan cronico no-infeccioso ta impone un carga mas grandi na cada un di e sistemanan di salud di cada pais, como tambe ta afecta negativamente e productividad di e poblacion trahador den nan.
Inactividad fisico, obesidad y dietanan imbalansa ta algun di e factornan di risico pa e malesanan cronico no-infeccioso.
Den e paisnan miembro di RAFA-PANA, no tin suficiente conocemento riba e aspectonan individual, di scol, hogar y medio ambiente cu por contribui na e problematica menciona.
Pa soluciona esaki a lansa e proyecto PILARES cu ta para pa: Perfil Internacional de estiLos de vida Actividad fisica en niños escolaRES. E projecto lo wordo realisa en cooperacion cu diferente universidadnan na Aruba, Chile, Colombia, Cuba, Puerto Rico, y Republica Dominicana.
Aruba tin oportunidad grandi di hunga un rol importante den e proyecto, ya cu Fundacion Movemiento Ta Bida ta conta cu mayoria di e ekiponan necesario pa realisa midimento y Gobierno di Aruba tin proyectonan planea, manera Proyecto Scol Saludabel.
RAFAruba lo mester cuminsa cu un proceso pa forma un grupo di investigacion cientifico cu lo carga nomber di: Centro di Investigacion riba Actividad Fisico, Ehercisio, Enbehemiento Saludabel, y Trabou.
Pa haci esaki posibel lo bay acerca Universidad di Aruba, Vrije Universiteit (VU) Amsterdam, Universidad di Puerto Rico, Universidad di Pereira di Colombia, pa menciona algun.
Den e lunanan cu ta keda di 2016 RAFAruba lo cuminsa tuma contacto cu Universidad di Aruba y otro universidad den region pa formalisa esaki.
Miembronan menciona di RAFAruba a asisti na e XV reunion di RAFA-PANA como tambe na e 5to Congreso di Educacion Fisica na Republica Dominica caminda diferente instrumentonan pa traha maneho a wordo presenta, como tambe a introduci e proyecto PILARES na e participantenan di e 12 paisnan presente.
Fundacion Movemiento Ta Bida ta haci uso di e oportunidad aki pa extende invitacion na tur otro organisacion cu ta realisa programanan di ehercisio y actividad fisico na Aruba, pa forma parti activo di e Red di Actividad Fisico di Aruba (RAFAruba).