PYONGYANG, Nort Korea – Nort Korea a adverti Merca diadomingo cu e maniobranan militar conhunto cu lo cuminsa dialuna na Zuid Korea no ta haci mas cu “benta gasolin riba candela” den un momento di tensionnan fuerte entre Pyongyang y Washington.
Pyongyang a realisa dos prueba di misil balistico intercontinental na Juli, cu parce di a pone na su alcance un bon parti di e teritorio di Merca, cual presidente Donald Trump a reacciona advirtiendo cu Washington por responde cu “candela y rabia.”
E regimen Nort Koreano a menasa e ora cu manda misil cerca di e teritorio Mericano di Guam, den Pacifico.
Y aunke cu lider Kim Jong-un, a para e proyecto aki despues, el a adverti cu su ehecucion lo depende di e comportamento di Washington.
Den e contexto aki, Zuid Korea y Merca, lo cuminsa dialuna su ehercicionan conhunto annual bao di e nomber “Ulchi Freedom Guardian,” durante cual decenas di miles di solda lo wordo entrena pa protehe e pais contra un eventual atake Nort Koreano.
Cada aña, Pyongyang, cu ta considera e maniobranan aki un provocacion, ta manda un menasa di represalia militar.
“E maniobranan conhunto aki ta e expresion mas explicito di su hostilidad pa nos y ningun hende por garantisa cu e eheercicionan aki no deriva den combatenan berdadero,” e unico partido na poder, Rodong Sinmun, a skirbi den un editorial diadomingo.
“E ehercicionan militar conhunto Ulchi Freedom Guardian lo ta mescoc cu benta gasolin na e candela y lo agrava e situacion riba e peninsula,” el a agrega.
Lansando un advertencia contra “e fase incontrolabel di un guera nuclear,” e corant a añadi: “si Merca perde den e fantasia, segun cual un guera riba e peninsula lo sosode dilanti di e porta di e otro, leu di nan na e otro banda di Pacifico, nan ta mas robes cu nunca.”
Mas grave cu nunca
E Departamento di Estado Mericano a anuncia cu e operacion “Ulchi Freedom Guardian,” basa riba e simulacionnan, cual inicio ta data for di 1976 y cu ta tuma su nomber di un general kende a defende e antiguo reino Koreano contra e invasor Chines, lo tuma luga e aña aki, manera cu e ta wordo premira.
Washington a nenga na precisa si e aña aki e lo reduci pa no aumenta e tensionnan, pero e ministerio Sur Koreano di Defensa a anuncia e participacion di 17500 solda, den un reduccion significativo respecto na e 25 mil cu a implica den e maniobranan di aña pasa.
Segun e agencia Sur Koreano Yonhap, e dos aliadonan ta studia e pertinencia di bandona nan proyecto inicial di desplega dos portavion cerca di e peninsula den e marco di e maniobranan militar conhunto aki.
Paralelamente, general Jeong Kyeong-doo, hefe di e estado mayor di e forsanan arma Zuid Koreano, a considera cu e situacion actual ta “mas grave cu nunca.”
Y el a adverti Pyongyang cu si nan expone represalianan grave den caso di un atake. “Den caso di e provocacion di e enemigo, (nos ehercito) lo tuma medidanan di represalia fuerte y determina pa hacinan lamenta amargamente,” el a afirma.
Ora cu Kim Jong-un a posterga e proyecto riba Guam, el a exigi pa Washington stop cu su “provocacionnan arogante” y a mustra riba “e enorme materialnan strategico nuclear” desplega den e region.
Fuente: www.afp.com