Recientemente PwC Aruba a organisa un seminario caminda a pone atencion riba e realidad fiscal nobo despues di e publicacion di Panama Papers. Panama Papers tin como consecuencia cu mundialmente enfasis ta wordo poni riba intercambio di informacion fiscal pa asina usa esaki como medio pa por rastrea ‘zwart geld’.
Ya pa algun aña por nota un acumulacion den e yamada pa transparencia y intercambio di
informacion entre autoridadnan fiscal mundialmente. Hans Ruiter (Tax Partner PwC Aruba) a
haci un introduccion di e tema aki y a splica over di Panama Papers en general. Tambe el a elabora mas tocante e introduccion di FATCA (Foreign Account Tax Compliance Act) di Merca cu tabata un di e prome stapnan tuma den direccion di mas intercambio di informacion. E ley di FATCA ta obliga paisnan mundialmente pa automaticamente comparti informacion di Mericanonan cu tin obligacion fiscal cu autordidad fiscal Mericano IRS. E publicacion di Panama Papers riba 3 di April di e aña aki a contribui na un estimulo nobo den e desaroyonan ariba menciona. Door di e ‘leaksnan’ reciente, Parlamento Europeo, riba 22 di November a introduci un ley caminda nan tambe ta permiti intercambio di informacion di banconan entre miembronan di Union Europeo. Esnan cu ta pro den Parlamento Europeo a argumenta cu e reciente ‘leak’ di informacion, entre otro e Lux Leaks y e Panama Papers, a demostra e importancia di introduccion di medidanan nobo pa garantisa transparencia. Un di dos medida y probablemente esun mas radical aproba den Parlamento Europeo ta esun cu ta obliga miembronan di Union Europeo pa establece un registro publico caminda nan mester registra tur beneficiario final (supuesto ultimate beneficial owner of ‘UBO’) di asociacionnan y supuesto trusts.
Durante e seminario di PwC, oradornan a trata diferente ley y reglamentonan cu a wordo introduci na nivel internacional y local. E oradornan tabata Roland Brandsma y Renate de Lange, tur dos Tax Partner pa PwC Hulanda, Hans Ruiter (Tax Partner na PwC Aruba) y tambe Anushka Lew Jen Tai (Senior Tax Manager na PwC Aruba).
Brandsma a elabora riba e variante Europeo di Panama Papers y e reaccionnan di Merca, Union Europeo y e Organisacion pa Desaroyo y Coperacion Economico (OECD).
Despues Renate de Lange a continua y a elabora tocante e acontecimientonan relaciona cu e registro di UBO na Hulanda, e lucha contra supuesto capital priva aisla (na Hulandes; Afgezonderd Particulier Vermogen of ‘APV’) y e cambionan den e APV regime proponi na Hulanda. Renate a termina su presentacion cu e posibilidad y limitacionnan cu e cambionan di e regimen fiscal Hulandes ta trece cune pa empresanan di inversion den exterior.
Despues di un pauze cortico, Hans Ruiter a splica e diferencia entre inversionnan cu ta drenta y sali. Debi na un regimen fiscal nobo (impuesto riba ganashi di 10% y 0% impuesto di retencion riba distribucion di dividendo) pa cierto actividadnan cualifica, Aruba por ta un lugar favorabel pa servicionan di finansas internacional.
Anushka Lew Jen Tai, experto den CRS, a conclui cu un presentacion riba e impacto di CRS (Common Reporting Standard) riba nivel mundial y e consecuencianan di esaki pa residentenan di Aruba. Como conclusion, Anushka Lew Jen Tai a discuti e regimen di multanan fiscal cu ta wordo aplica na residentenan di Aruba cu no a raporta nan entrada di afor of cu no a raporta esaki completamente y tambe cu ta spera cu autoridadnan fiscal lo ricibi e informacionnan aki di otro paisnan den e añanan venidero. Tambe ela elabora riba e posibilidad pa coregi voluntariamente pa preveni multa nan fiscal door di autoridad fiscal.
E conclusion di e expertonan di impuesto di PwC ta cu si Aruba pasa e ley cu ta haci’e posibel pa raporta di acuerdo cu CRS, pronto por haña internacionalmente fluhonan nobo di informacion y cual lo tin consecuencianan pa residentenan di Aruba. E intercambio di informacion di aña 2017 lo cuminsa pa CRS den 2018. Residentenan di Aruba cu no a raporta completamente of a raporta parcialmente nan entrada y inversionnan den exterior, por haya un sorpresa desagradabel ora cu pronto e informacionnan aki wordo intercambia automaticamente cu autoridadnan di Aruba. Cu otro palabra, ta importante pa ta bon prepara y pa tuma medidanan necesario na tempo pa cu esaki na e autoridad fiscal.