HELSINKI, Finlandia- “E combersacionnan cu e presidente di Merca, Donald Trump, a tuma luga den un ambiente franco y profesional. Mi ta haya cu nan tabata exitoso y util”, e mandatario Ruso, Vladimir Putin, a declara. Esaki a tuma luga durante un conferencia di prensa conhuntamente cu su homologo Mericano, den e capital di Finlandia, Helsinki.
“Ta evidente pa nos tur cu e relacionnan bilateral entre Rusia y Merca ta pasando den un periodo dificil. No obsante, e dificultadnan aki y e atmosfera tenso cu tin actualmente no tin motibonan obhetivo”, Putin a declara. El a agrega cu “e guerra frieu a caba masha tempo caba. E epoca di enfrentamentonan ideologico duro a keda atras den pasado y e situacion na mundo a cambia cardinalmente”.
Di mes manera e presidente Ruso a expresa su sperasa di cu e combersacionnan di 16 di juli a marca e prome pasonan pa mehora e relacionnan entre Merca y Rusia. Tambe e lider a subraya cu Rusia y Merca ta enfrenta na desafionan y riesgonan comun, pa cual ta necesario cu ta uni esfuersonan.
Putin a indica di cu Moscu ta dispuesto na desaroya e cooperacion cu Washington, den varios ambito, incluyendo e lucha contra terorismo y cibersiguridad. Tambe, e mandatario a sigura cu e partinan Ruso y Mericano lo mester lidera hunto un proceso cu lo trece pas pa Siria y e cooperacion humanitario den e pais Arabe aki.
Ademas, e presidente Putin a bisa cu el a entrega su homologo Mericano un carta cu propuestanan relaciona cu e desaroyo di armanan nuclear.
“Siendo e potencianan nuclear mas grandi, nos tin e responsabilidad special pa siguridad internacional. Mi ta kere ta importante y nos a papia di esaki, pa cuminsa un dialogo riba e problemanan di stabilidad strategico y e no desaroyo di armanan di destruccion masivo”, Putin a agrega.
Di otro banda, e lider Mericano a inidca cu e “relacionnan entre Rusia y Merca nunca tabata asina malo manera awo, pero e situacion a cambia radicalmente despues di e cumbre na Helsinki”. Presidente di Merca a indica tambe cu el a boga pa Washington y Moscu haya un oportunidad di coopera “si nan kier haya e forma di mehora e situacion na mundo”.
Tambe e lider di Merca a indica cu e ta sigur di cu Moscu lo traha hunto cu Washinton den e desnuclearisacion di Noord- Korea.?
Durante e conferencia di prensa conhunto, Trump a declara cu e tabata considera corecta pa durante su encuentro cu Putin, trata e tema di e supuesto interferencia Ruso durante e eleccionnan presidencial na Merca.
“Presidente Trump un biaha mas toca e tema di e supuesto interferencia Ruso den e proceso electoral cu Merca. Mi mester a ripiti loke ya caba mi a bisa varios biaha, incluyendo den e reunionnan personal cu e presidente Mericano: estado Ruso nunca a interveni y no tin intencion di interveni den e asuntonan interno di Merca, incluyendo e proceso electoral “, e lider Ruso a sigura.
E president Ruso, Vladímir Putin, y e Mericano Donald Trump, a reuni dia 16 di juli den e palacio Presidencia den cuadro di nan prome cumbre bilateral.
Durante e encuentro e mandatario a toca un serie di materianan internacional y e relacionnan entre e respectivo estadonan.