Puis X School hunto cu DIVI HOTEL nomina pa Raad van Kinderen AWARD 2017

0

Raad van Kinderen ta un iniciativa di Missing Chapter Foundation y UNICEF Hulanda, funda na 2010 door di Prinses Laurentien Van Oranje caminda cu e derecho di mucha; nan opinion tambe ta conta, ta wordo poni den practica.
Desde 2015 Aruba ta conta cu 8 scol basico cu ta forma parti di Raad van Kinderen Aruba. E klasnan participante ta forma e Raad van Kinderen pa un organisacion of compania, caminda ta yudanan cu posibel solucionnan pa cu e dilema cu e organisacion ta presenta na nan. Cu ayudo di nan maestro nan ta traha 6 siman intensivo pa bin cu solucionnan creativo, fresco y positivo. Asina e muchanan ta haña e chens pa laga nan voz resona den decisionnan importante cu ta trata nan futuro.
E aña aki ta prome biaha cu un Raad van Kinderen Award Night ta wordo organisa na Hulanda caminda cu 40 Raad van Kinderen di entre otro Hulanda, Francia, Alemania y diferente isla den Caribe incluyendo ARUBA ta participando hunto cu nan organisacion. E award aki ta wordo otorga na e scol y organisacion cu a traha e miho reportahe anual, segun votacion di mucha.
Scolnan di Aruba participando ta Scol Primario Kudawecha klas 6A hunto cu AHATA , Pius X School klas 6A hunto cu Divi Hotel y Pius X School klas 6B hunto cu Renaissance Hotel.
E grato noticia a drenta cu Puis X klas 6A hunto Divi Hotel a keda nomina pa Raad van Kinderen Award, cu lo tuma luga di 22 di Juni venidero den Concertgebouw di Amsterdam.
Cabesante di Puis X School juffrouw Sheila, meneer Henry Barrera, dos alumno di klas 6A hunto cu directiva di Divi Hotel ta biahando pa Amsterdam pa asina asisti na e anochi aki. Un danki grandi na Missing Chapter Foundation, Unicef y Divi Hotel cu ta haci esaki posibel.
Awor pa bin cas cu e AWARD tur mucha di Aruba te cu 18 aña por vota desde diasabra 17 di juni te cu diaranson 21 di juni 12or di merdia.
Djies klik riba link aki: www.rvkawards.nl y vota pa klas 6A di Pius X y Divi Hotel.
Maestronan tambe por vota pa nan klas!
Nos ta desea Pius X School y Divi Hotel tur clase di exito!