Diasabra mainta tempran e team di Brazil Taekwondo Stichting a baha na Valero Santa Cruz, dilanti Top FM y na e negoshinan den cercania cu e meta pa bende nan calender 2017 pa e biahe pa Korea na aña 2017.
Brazil Taekwondo Stichting ta hopi gradici cu e pueblo di Aruba cu a duna nan sosten cumprando un calender sea pa nan cas, negoshi of djis pa yuda. Hopi di e comentarionan tabata pa e bunita potretnan, pa e bunita luganan di Aruba y pasobra e calender ta hopi colorido. Hopi a bisa cu nan ta yuda deporte y hasta algun a comenta cu semper nan ta sostene Brazil Taekwondo Stichting, pasobra unda cu nan biaha nan ta trece premio Aruba. Diasabra tabata un dia unda cu e awasero a cay, pero esaki no a stroba ni tampoco a stop e hendenan di subi caya y haci nan compras y tambe contribui cumprando calender, manera varios empresario den nos comunidad. Brazil Taekwondo Stichting ta contento di por a mira otro deportistanan cumprando un calender di Brazil Taekwondo Stichting. Un pueblo digno y cu curason pa deporte. Ainda e benta di calender no a caba, pasobra ainda tin algun 100 calender pa bende.
Nos deadline pa bende tur e calendernan ta dia 28 di December 2016 pa asina nos por cuminsa prepara e biahe pa tur esnan cu a cumpli cu e benta di 300 calender of cu ta bay pone e diferencia di placa. Te ainda no ta confirma unda nos ta bay para e weekend aki nos dilanti.