Pruebanan di un vacuna nobo contra AIDS ta rebiba speransa

0

SUR AFRICA – Sur Africa lo lansa diaranson un ensayo clinico di un envergadura inedito destina na purba un vacuna experimental contra AIDS, despues di trinta aña di esfuersonan en vano, AFP a informa.
Pa prome biaha desde e identificacion di e virus na 1983, cientificonan a kere cu nan a haya un estudio prometedor.
Batisa HVTN 702, e estudio, cu lo cuminsa diaranson, lo implica durante cuater aña mas di 5400 boluntario, homber y muhenan sexualmente activo entre 18 y 35 aña, den 15 luga reparti den henter e teritorio Sur Africano.
E ensayo clinico aki, un di esunnan mas importante hamas realisa, ta rebiba e speransa di e comunidad cientifico.
“Si e wordo uza na e mesun momento cu e metodonan di prevencion cu eficacia proba cu ya nos a uza, un vacuna sigur y eficas por constitui e golpi di gracia contra HIV,” Anthony Fauci, director di e Instituto Nacional di Alergia y Malesanan Infeccioso (NIAID) di Merca.
Incluso un vacuna moderadamente eficas lo reduci di forma significativo e peso di enfermedad den pais y poblacionnan hopi infecta, e responsabel di NIAID, cu ta participa den e estudio, a añadi.
E hecho di eligi Sur Africa pa purba e vacuna na gran escala no ta anodino. E pais di Africa austral aki, ta registra un di e indicenan di prevalencia mas eleva di mundo (19.2% segun Onusida). Mas di shete miyon di persona tin HIV den e pais aki. Na mundo, dosm iyon y mey di persona a resulta infecta cada aña pa e virus, cu a causa mas di 30 miyon di morto desde decada di 80, segun un estudio publica den e conferencia internacional di Durban (oost di Sur Africa) na Juli.
E vacuna “Sur Africano”, specialmente adapta na poblacionnan local, ta un version ‘reforsa” di un vacuna purba na 2009 na Tailandia, riba mas di 16 mil boluntario.
Esaki a permiti 31.2% di riesgo di contaminacion, tres aña y mey despues di e prome vacuna.
E siguridad di e vacuna “Sur Africano” a wordo proba cu exito durante 18 luna den 252 boluntario. E ensayo nobo aki kier ratifica awo su eficacia na 50%,” dokter Lynn Morris, di e Instituto nacional di Enfermedadnan Contagioso (NICD) di Sur Africa, a splica AFP.
“Nos tin speransa cu e eficacia lo ta ainda mayor,” vice presidente sur Africano, Cyril Ramaphosa a bisa recientemente dilanti diputadonan.
Pero, apesar di e optimismo cu e vacuna aki a lanta, e specialistanan ta insisti den e necesidad di no baha e guardia pa loke ta e enfermedad.
“Un vacuna eficas lo ta un punto di inflexion, pero e ensayonan aki lo por dura añanan largo,” Morris a insisti. “Nos tin cu sigui uza e otro metodonan di prevencion pa reduci contaminacionnan nobo,” el a reitera.
E tratamentonan antiretroviral (ARV) ta sigui ta, cu diferencia, e mas eficas contra e enfermedad.
Segun Onusida, mita di e 36 miyon di persona infecta pa e virus na mundo tin acceso na dje. Un cifra cu a duplica den cinco aña.
Danki na e tratamentonan aki, cu ta permiti controla e evolucion di e virus y aumenta e speransa di bida di e seropositivonan, speransa di bida di e Sur Africanonan a pasa di 57,1 pa 62,0 aña di media desde 2009, segun autoridadnan local.
E ensayonan di e vacuna nobo aki ta dirigi pa e Institutonan Nacional di Salud (NIH) di merca, e Conseho Sur Africano di Investigacion Medico (SAMRC), Fundacion Bill y Melinda Gates, laboratorionan Sanofi Pasteur y GlaxoSmithKline y Red di Ensayonan di Vacuna contra HIV (HVTN).
Fuente: El Universal