Durante varios luna CEDE Aruba, cu ta e organizador di e proyecto Feria Social 2017, a yuda guia y monitoria, hoben boluntarionan cu a traha conhuntamente cu directivanan di Centronan di Bario pa asina termina nan projecto pa e Centro.
Na cuminsamento di 2017, Centronan di Bario, YMCA y Teresita Center a entrega un proyecto cu lo wordo completa door di hobennan boluntario y sosteni door di sector priva. Proyectonan manera instalacion di speeltuin, crea un area di gym, crea un lugar unda hobennan por topa, organisa anochi di pelicula y diferente weganan den bario y mucho mas.
Mas di 80 hoben entusiasma a particpa den e edicion aki di FERIA SOCIAL. Fuera di haci trabou boluntario e hobennan a ricibi diferente training personal entre otro liderazgo y maneho di proyecto.
Diahuebs 5 di October 2017 CEDE Aruba a organisa pa tur boluntario cu a forma parti di FERIA SOCIAL 2017 un actividad recreativo duna pa Reach Your Goal Foundation y Sra. Elsa Krosendijk. E meta di e actividad aki ta pa e boluntarionan a conoce otro mihor, socialisa y crea relacion positivo cu otro. Esaki tabata un exito total.
Awo orguyoso por bisa cu FERIA SOCIAL 2017 ta den su etapa final! Boluntarionan ta trahando duro pa caba cu e proyectonan pa e fin di luna aki. E anochi final di FERIA SOCIAL 2017 lo tuma lugar e prome siman di November 2017.
CEDE Aruba kier gradici tur comerciante cu a contribui na e proyecto aki, cu a mira e importancia den trece un comunidad hunto por medio di nan centronan di bario. Un danki specialmente na WEB Aruba N.V., Aruba Tourism Authority, Fantastic Gardens y AMC Unicon. Masha danki pa a forma parti di FERIA SOCIAL 2017 pa asina haci di e edicion aki uno exitoso.