Por mira cu e desaroyonan di e proyecto di Watty Vos Blvd ta bayendo hopi lihe pa cual aki e puntra director di DOW Sr. Marlon Croes con e caminda ta core y e proceso pa esaki keda cla pa 2018.
Lo cuminsa asfalta e parti entre Seroe Patrishi cu Tanki Leendert pa despues nan bin bek pa direccion di patras di Codemsa. Nan tin cu traha tres duiker grandi, cu tin e rooi cu ta pasa entre Meiveld cu Seroe Patrishi. Esey ta bay tuma mas tempo y tambe mas man. Pa duna un idea, e Watty Vos Boulevard ta cuminsa na rotonde di FCCA, bay direccion Codemsa, pasa pariba di Codemsa bay noord, pasa pariba di San Barbola Residence drenta Seroe Patrishi pasa door di ex- veld di Sibonne, bay direccion Tanki Leendert te na Acero, djey e ta sigui bay abao te cu Ponton, crusa cu Caya Ernesto Petronia sigui pa Hato, baha sabana dilanti di Le Mirage pazuid di sede di SEPPA sigui bay abao, bay riba e crusada caminda pa Fantastic Garden na Bushiri pa sigui bay pasa dilanti Karting cu Freezone pa bay cay ariba e crusada di Sun Plaza. Esey ta e caminda principal. Despues den mantencion ta tuma Sun Plaza, bay direccion di crusada di SuperFood, cu tambe e crusada lo wordo comberti den rotonde. E rotonde di Eagle Bowling Palace lo wordo upgraded bay te na e rotonde den construccion awor banda di Hospital.
Sr. Croes a sigui splica cu den e area di embeyecimento lo tuma Irausquin Blv for di Sun Plaza te cu Riu Antillas, cu lo wordo embeyece, unda lo pone mata, elimina e caminda bay abao, haci e beachnan mas grandi, pone facilidadnan pa parkeer auto. Embeyece cu voetpad, fietspad, iluminacion cu ta tene cuenta cu medio ambiente. Mester tene cuenta cu tin tortuga ta hatch eybanda.
Aworaki ta trahando ariba un greenfield, for di Codemsa te cu Sun Plaza, ta trahando den mondi cu ta bay facil. Unda cu bo ta crusa na e caminda di Sta. Cruz, Seroe Patrishi, Ponton, Bushiri y ora cuminsa mishi eynan, lo cuminsa influencia e fluho di trafico. Ora ta asina leu lo informa pueblo debidamente, con e cambio di ruta lo bay ta, pa nan por core.
E trabaonan a inicia na Maart/April e aña aki y ta programa pa caba Augustus 2019, segun Sr. Marlon Croes, director di DOW a splica.