Un Proyecto cu ta duna comunidad e oportunidad pa inscribi un hoben cu ta hasi e diferencia sea ta den trabao social, cultural, deportivo, boluntario, mehorando su propio desaroyo of como entrepreneur, den media (comunicacion), den arte y musica. Tanto mayornan, amigonan, maestronan, lidernan y e hobennan di edicionnan Poder di Hubentud 2015 y 2016 mes a sali busca hobennan potencial den diferente districto, clubnan social y scolnan buscando e hoben “rolemodel” cu merece di haña un reconocimento. ATHA ta carga e proyecto aki y ta hopi satisfecho cu e acogida unda cu mas di 40 inscripcion a drenta y un total di 36 hoben a keda nomina e aña aki.
Sr. Ricky Hoek, director di ATHA a gradeci e hobennan y comision Poder di Hubentud cu a yuda tanto den duna informacion pa recruta hobennan como tambe durante di e sorpresa pa e anochi di nominacion. Un danki special ta bay pa Reach Your Goal Foundation cu a prepara un Car Rally ficticio pa asina hinca e hobennan den un sfeer diferente y sin cu nan sa cu nan lo ta e proximo nominadonan. Un gran cantidad di auto yena cu amigo, famia y conocirnan a yuda den hasi e anochi uno olvidabel pa e hoben nomina. Na final Sr. Gregory Milliard hunto cu Annelaine Jacobs a sorprende e hobennan bisando nan cu nan ta e nominadonan pa Poder di Hubentud 2017. Bou di aplauso, apoyo di tur famia y amigonan presente a entrega uniform y certificado na e hobennan cu lo sigui e trayecto di Poder di Hubentud 2017.
Un danki tambe na Centro di Bario Noord pa nan aporte na e evento aki. Hobennan hunto cu nan mayornan a sinta hunto cu comicion pa asina mira con henter e proyecto y cursonan ta hinca den otro. Algun di e hobennan lo no por cumpli cu henter e trayecto mirando cu nos tin hobennan atleta cu mester respresenta nos país den exterior of ta sigui nan estudio den exterior.
Mayornan satifecho a duna aprobacion y awo e trayecto mes ta cuminsa cu e diferente cursonan y momentonan di teambuilding. Durante simannan binidero nos lo duna mas informacion di cada nominado di Poder di Hubentud 2017.