Door di demanda pa cas social, FCCA y Gobierno a dicidi di expande e proyecto Kiviti cu mas cas. Franlin Leest, relacionista publico di FCCA, a splica cu a pone e prome piedra di e 16 viviendanan cu ta extension di e proyecto cu ta existi caba den Palisiaweg. Eynan ta bay traha 16 cas mas. E tereno ta basta grandi pa sigui extende e proyecto eynan. Ta viviendanan cu hopi biaha por wordo gehuur of por wordo bendi. Nan ta casnan Duplex, pega na otro y esey ta pa por tin mas cas riba mercado. Den e caso aki a uza e infrastructura cu tey caba. Pa un expansion mester habri e infrastructura eyden. E casnan aki ta bay wordo construi door di e compania Calidad Construction y den mas of menos luna di Juni nan mester por keda cla.
Awor aki tin un lista un tiki largo di hende cu ta spera un cas, segun Leest. Si ta pa cumpra, mester bin na remarca pe. Mester tin manera pa por carga un hipoteca. Pa huur mester por ta inscribi na FCCA pa bin na remarca pa un di e casnan.
Tin demanda tin basta peticion, segun Leest. Tin hopi interes pa biba pariba. E lista ta largo manera ya menciona. Ta hopi importante pa construi mas tanto caso posibel. Hopi biaha e ta mara na e tereno cu tin. Si e tereno ya caba ta desaroya pa construi, e ta bouwrijp. Tin infrastructura poni pa por construi. Esey no ta tur caminda ta e caso.
E viviendanan aki por cierto tin un estilo, un manera di construccion cu nan ta pega na un solo huki. E casnan no ta comparti muraya. Nan ta pega na un huki. Nan a bin resulta hopi bon cu ta duna hopi privacidad y ta haya hopi menos problema den tipo di construccion aki y den e barionan aki.
Ta sigui cu nan den e bario tambe, segun Leest.
E casnan aki lo yena hopi rapido manera cu por mira. E tereno ta basta grandi cu mas cas por wordo traha. Tin proyecta por lo menos 72 cas riba e tereno ey. Sinembargo mester spera pa rosa e tereno un tiki mas y pone un infrastructura pa por construi.