Ta conoci cu for di comienso di planificacion, otorgamento di permiso y construccion di e renobacion/expansion di HOH mi a cuestiona e forma di procede di esunnan responsabel pa e proyecto aki na Aruba. Mi a hasta menciona nomber di esunnan, cu segun ami, ta
coresponsabel hunto cu e gabinete di Mike Eman y e ministernan di Salubridad Visser y Schwengle di fraude y corupcion!! Remarcabel ta cu nunca mi a wordo yama pa responsabilisa mi keho dilanti di mesa berde pa calumnia. Por que cera?
En todo caso eleccion ta tras di lomba y mi ta spera cu e gobierno nobo si lo sa di cumpli cu e promesa haci prome cu eleccion di laga haci un investigacion profundo di henter e proyecto aki. Awor aki mas cu nunca e necesidad pa investiga e proyecto ta na ordo di dia, despues di algun comentario cu mi a logra di haya den mi postbus.
Mi a bin comprende cu den e edificio nobo a “lubida” di incorpora coriente di 220 volt y cu unicamente 110 volt a wordo instala. Esey kiermen mas “meerwerk” ya cu mester instala toch 220 volt. Mescos cu e falta di cambernan di operacion. Probablemente lo a cobra mas “meerwerk” tambe ora diripiente a dicidi di muda ICU y Medium Care pa e edificio nobo, pero “geen haan di ernaar kraait”, pasobra no ban lubida cu e compania Frances cu a entrega un proposicion menos costoso pa e proyecto aki si a indica cu lo NO cobra pa “meerwerk”.
Tambe a yega na mi horea cu e preparacion pa muda e pashentnan pa e edificio nobo ainda no a tuma luga. Nos por corda con a haci traspaso di yabinan di e edificio nobo pa directie di hospital dia 31 di juli. Un dia despues esta 1 di augustus a tene un “open dag” y comienso di september a muda entrada di hospital na e edificio di policlinica nobo (MOB) pa asina por duna inicio na renobacion di e edificio bieu. Medio september sinembargo nos a haya notificacion di hospital cu ta den training di personal pa e mudamento y awor cu nos ta na 9 di october 2017 ainda nada no a tuma logra.
E unico splicacion posibel di parti di directie di hospital hunto cu e Hunta di Supervision ta, cu nan a coopera cu gobierno pa prome cu eleccion participa den “kierzersbedrog” door di haci comosifuera tur cos ta “koek en ei” cu e proyecto.
A yega sinembargo na nos oido mas dato cu lo por indica cu en berdad fraude/corupcion a tuma logra na unda probablemente lo bay cobra pa menos metronan cuadra construi na e edificio nobo, como tambe un diferencia di suma cu a presta y loke mester bay wordo paga.
En total lo por papia di un suma di alrededor di 96 miyon florin cu lo mester wordo responsabilisa. Por ta cu lo por tin un bon splicacion pa tur e insinuacionnan aki y esey lo por sosode unicamente pa medio di un investigacion profundo y imparcial.
Y no ta spera cu no ta haci esaki, pasobra cu lo tin algun dichosonan cu ta come di “beide walletjes”!! Ya cu den varios otro asunto nos ta tuma nota presencia di e dichosonan aki, por ehempel na WEB, RDA, ANSA, etc. etc.
Ta p’esey e unico manera pa pueblo haya sa e berdad sunu ta pa medio di un investigacion profundo y imparcial conduci dor di un instancia internacional manera Gobernador a sugeri den su informatieopdracht. Y instancia miho indica segun UPP ta Transparency internacional.