Director di Cede Aruba, sr. Daniel Tecklenborg ta di opinion cu e proyecto di Aqua48 y Web Aruba NV, ta uno positivo, mirando cu ainda tin hopi plan pa sigui yuda mas fundacion. E proximo fundacion cu lo wordo yuda ta uno cu ta trata cu animal.
Cede Aruba ta administra e fondonan di Aqua48 y nan tambe ta conseha y haci e procedura di e peticion di e proyectonan. Pesey el a anuncia e siguiente meta. Nan ta contento cu Ambiente Feliz ta haya su donacion pa e proyecto.
Tecklenborg a sigui splica cu pa e siguiente tres luna nan lo recoge fondo pa un fundacion cu ta enfoca riba animal y e proyecto yama Crioyo Trappers. E proyecto aki ta pa baha e cantidad di cacho riba caya y pa yega na un poblacion di animal mas saludabel y sterilisa. Na e mesun momento e fundacion aki tambe ta enfoca riba educacion di pueblo, haci hende mas conciente con pa trata animal y kico ta concerni gasto pa mantene un animal saludabel y enfatisa riba e importancia pa sterilisa.
Cede Aruba ta invita henter pueblo, tur hende cu conoce Aqua48 caba of no, pa yuda Aqua 48 durante e tres lunanan aki, pa asina yuda pa e donacion aki bira uno bunita, mesun cos cu esun di e shete ultimo donacionnan, di cual un di nan tabata Ambiente Feliz. Yuda Aqua48 pa nan yuda comunidad.
Tin cuater categoria cu ta tene cuenta cun’e, cual ta bestia, hende cu limitacion, hoben y hende grandi. Tin pa cada aña, ta parti e coleccion di fondo di Aqua48 den cuater periodo, esta cuater kwartaal. Ta enfoca riba e temanan ya menciona, esta animal, hende cu limitacion, hende grandi y hubentud. Cada bes Cede Aruba mes ta acerca e fundacionnan si nan tin idea pa un proyecto y ta pidi nan pa entrega un peticion chikito unda nan ta concretisa kico nan kier logra y kico e resultado lo ta. A base di peticionnan, na final e comision di Aqua48 ta scoge pa un di e iniciativanan cu lo por haya e coleccion di fondo den e kwartaal eynan.