Siman pasa, fraccion di MEP a reuni cu IMF, y awo e conclusionnan preliminar di nan estudio a sali publica den prensa local. E conclusionnan aki ta refleha e preocupacion serio cu IMF tin pa cu e situacion financiero y economico na Aruba.
Aruba no a conoce crecemento economico, ni tampoco riba tereno di turismo. Y esaki den relacion cu e MEGA DEBE cu gobierno di AVP a hinca nos pais aden, ta hasi e preocupacion mucho mas grandi.
Esaki a keda expresa durante e reunion cu lider di MEP Evelyn Wever-Croes y coleganan Ady Thijsen y Guillfred Besaril a hiba cu delegacion di IMF siman pasa na Banco Central. Y ta e linea cora den e conclusionnan preliminar publica den prensa local.
IMF a expresa nan preocupacion riba crecemento economico di Aruba. Economia di Aruba tabata y ta sigi hopi swak, no tin mucho crecemento. E unico speransa ta e refineria, maske no tin informacion concreto ki dia por spera e re-apertura.
E preocupacion pa cu e debe di pais Aruba, ta hopi grandi pasobra un debe halto asina tin un impacto negativo riba crecemento economico. IMF a indica cu 84 pa 85% di debe manera Aruba a conoce ta alarmante y a indica cu gobierno mester pone mas esfuerso pa baha esaki.
IMF ta comparti e preocupacion di fraccion di MEP cu gobierno no a tuma medidanan structural pa soluciona e problemanan financiero di pais Aruba. Tambe IMF ta preocupa con e tantisimo PPP nan lo influencia e posicion di debe di gobierno.
Riba turismo tambe IMF a indica cu Aruba su resultadonan riba turismo ta mucho mas MALO cu otro destinacionnan similar. IMF a keda preocupa cu esaki.
IMF lo traha su rapport una bes nan keda cla cu tur analisis y lo publica esaki. Un cos ta sigur, e situacion no ta asina bunita manera Gobierno ta pretende. Y ta hopi trabou ta spera e gobierno nobo pa drecha e situacion financiero di pais Aruba. Un cos si ta sigur, e gobierno actual no a logra drecha tur locual nan a daña den finansas publico. Cu Gobierno di Mike Eman a redobla e debe di pais Aruba, tur hende sa. Cu gobierno di Mike Eman a faya, tur hende sa. Y cu gobierno di Mike Eman no por soluciona e problema serio di e MEGA DEBE, tambe tur hende sa.
“Pues awor ta den BO man, si realmente bo kier pa finansas publico di Aruba wordo mehora, ban hunto p’e cambio, sin miedo. E cambio cu nos di MEP ta ofrese ta poniendo e ser humano central. Corta gastonan di luho di e ministernan prome, y no mishi cu pueblo. Pueblo a sacrifica suficiente caba durante e 7 añanan aki, awor ta momento pa e ministernan hala faha mara”, lider di MEP Evelyn Wever-Croes a duna di conoce.