NORCIA, Italia – Un poderoso temblor a sacudi Italia diadomingo den e mesun regionnan central cu a wordo afecta pa movimientonan reitera telurico en e ultimo dos lunanan y a procova e caymento di mas edificio, pero no a reporta ningun morto den forma inmediato.
E teremoto cu tabata di magnitud 6.6 segun Servicio Geologico di Merca, tabata mas poderoso cu esun di dia 24 di Augustus, cu a laga casi 300 morto. Hopi persona a bandona e zona for di e tempo ey, loke a yuda na evita un cifra nobo devastador di fayecido.
E mas reciente teremoto a wordo sinti den casi henter Italia pa 7’or y 40, ora local, cu su epicentro cerca di e historico ciudad rondona di muraya di Norcia, mas of menos 100 kilomter di e ciudad universitario di Perugia.
E residentenan spanta di Norcia a sali riba caya y e Basilica antiguo di San Benedicto a cay den otro y solamente su front a keda para. Religioso y habitantenan di e localidad a hinca rudia den e plaza principal di e ciudad den oracion silencioso dilanti di e iglesia distrui.
“Esaki ta un tragedia. Tabata un tiro di gracia. E basilica ta den ruina,” obispo di Norcia, Renato Boccardo a bisa Reuters.
“Tur hende ta den un estado di miedo y stress sin fin,” Boccardo a comenta, den referencia di e miles di aftershock cu a sacudi e zona desde Augustus, incluyendo dos teremoto di gran magnitud diaranson.
Unidad di Proteccio Civil di Italia, cu ta coordina e ayudo den caso di desastre, a bisa cu varios cas a resulta distrui diadomingo den e regionnan di Umbria y Las Marcas, pero cu tabata sin habitante na e momento ey of cu e mayoria di e residentenan a logra sali prome.
“No a informa riba morto, pero tin varios herido,” hefe di Proteccion Civil, Fabrizio Curcio, a bisa den un rueda di prensa y a agrega cu solamente un persona tabata grave.
Servicionan di rescate “no ta buscando ningun hende,” Curcio a indica, kende a señala cu e teremoto a causa mas of menos 20 persona herida, “algun poco” di cierto gravedad, aunke nan bida no ta core peliger.
Aunke e no a concreta e candida di desplasado, el a afirma – den declaracionnan transmiti via television – cu ta “hopi”, ya cu esun di awe a suma rond di 4000 persona cu a bandona nan cas tras di teremotonan registra diaranson pasa den e mesun zona.
E poblacionnan ta practicamente bashi debi cu mayoria di nan habitante a wordo reubica den otro zonanan a rais di e teremotonan cu a asota e region di diaranson, e mayor di magnitud 5,9.
Autoridadnan local a bisa cu ciudad y aldeanan afecta pa e mesun 6.2 di magnitud di Augustus a sufri mas daño significativo. Expertonan a bisa cu e teremoto di diadomingo tabata esun di mas poderoso desde uno di 6.9 di magnitud zuid di Italia na 1980 cu a laga 2735 morto.
Italia ta riba dos faya geologico, loke ta convirtie den un di e paisnan mas sismico di Europa.
E teremoto mas mortal na Italia desde comienso di siglo XX a tuma luga na 1908, ora cu un teremoto sigui pa un tsunami a laga 80 mil morto den e regionnan sureño di Reggio Calabria y Sicilia.
Fuente: NTN24