Despues di a tene nan evento “HOPE Hurricane Relief Benefit” diasabra ultimo pa sostene islanan ruman cu a sufri daño pa motibo di Horcan Irma, Hope Aruba na e momento aki ta monitor e situacion pa manda articulonan St. Maarten mirando e menasa di Horcan Maria.
E evento “HOPE Hurricane Relief Benefit” cu a tuma lugar na YMCA San Nicolas for di 9or di mainta pa 5or di atardi a trece un sosten masal for di tur parti di Aruba.
“Awor aki nos ta planeando cu algun compania pa wak con pa transporta tur e articulonan cu a drenta pa St. Maarten, sin cu drenta den e area di Horcan Maria,” Tabitha Smith-Heemstadt, Coordinador di Hope Aruba a duna di conoce.
“Na e momentonan aki nos ta trahando cu Rode Kruis pa transporta loke ta cuminda y awa via avion pa nan yega lo mas pronto posibel. Tambe nos ta den comunicacion Rode Kruis di St. Maarten hunto cu e team cu HopeAruba ta den colaboracion cu ne na ayanan pa por distribui e articulonan una bes nan yega e isla,” Smith-Heemstadt a sigui bisa.
Representantenan di HopeAruba mes tambe lo ta biahando pa St. Maarten pa asina evalua e necesidadnan cu tin y tambe percura pa documenta henter e proceso pa por comparti esaki tambe na tur cu a aporta na e causa.
“Diasabra tabata un evento exitoso. E ekipo cu a yuda tabata tremendo. Tabata tin tambe hopi voluntario cu a bin trece articulonan cu a dicidi pa keda y asina yuda nos mirando e gran cantidad di cosnan cu nos a ricibi.”
Smith-Heemstadt a bisa cu nan a haya masha hopi paña cu na e momentonan aki a pone un paro riba esaki. “Nos ta acepta solamente paña pa mucha pero ainda nos tin mester di comestibles di bleki, awa y tambe lona cu por sirbi como cobertura temporario pa esnan cu ta trahando bek pa reconstrui e dak di nan hogar. Pa awor aki nos lo keda pendiente pa manda tur loke por lo mas pronto posibel, mey mey di un situacion di “Maria” y posiblemente lo bay tin un di dos HOPE HURRICANE RELIEF BENEFIT. Nos lo anuncia esaki pronto via nos medionan social como tambe prensa local.”
E evento di diasabra ultimo, a bay den colaboracion cu Regal Planners di Sra. Natalie Silvania, kendenan ta manda palabranan di gradicimento na tur cu a duna nan sosten na e causa.
Pa esnan cu ainda ta desea di aporta por haci esaki via nan cuenta di banco; HopeAruba Movement Foundation, L.G. Smith Boulevard 150, Oranjestad, Aruba – Aruba Bank Account # 2616140190. Ta pidi pa menciona HOPE HURRICANE RELIEF BENEFIT hunto cu nomber completo den e discripcion. Tambe por tuma contacto cu Smith-Heemstadt na 5949052 of Silvania na 5934409.