HAVANA, Cuba – Cu un saludo di cañon di awa, dialuna a baha e prome vuelo regular for di Merca na Havana dialuna, den mas di 50 aña, den coincidencia cu e tributo postumo na Fidel Cstro, e ireductibel adversario di Washington.
Ora cu a reserva nan ticket na Merca, e pasaheronan di e vuelo di American Airlines (AA), nan tabata leu di imagina cu nan biahe pa e isla aki lo ta marca pa mordo di Fidel, principal antagonista di Washington, kende a fayece diabierna na edad di 90 aña.
“Mi no a imagina esaki, el a tumami pa sorpresa,” pero “ta causanan natural, tur loke nace tin cu muri,”, e Cubano-Mericano Simon Rodriguez a declara na su yegada na un isla cu na principio di e siman, tabata tin homenahenan masivo na e tata di e Revolucion Cubano.
Desde Augustus, e aerolineanan Mericano a bin ta bulando pa interior di Cuba, pero e prome vuelo di AA ta e prome pa yega e Capital.
Mientras e vuelo di AA a baha na e aeropuerto internacional di Havana, cientos di miles di Cubano a kibra den yanto of den silencio, tabata desfila riba e Plaza de la Revolucion como tributo na Fidel.
E homenahe no lo conclui te cu diadomingo ora cu su shinishi wordo dera den e santana di Santa Ifigenia na Santiago de Cuba, 960 kilometer oost di Havana. “Ta un experiencia di un biaha den bida,” e pasahero Mericano, Priva Rhat a bisa periodistanan prome cu el a tuma e vuelo na Miami. “E lo ta interesante mira con e hendenan ta responde na su fayecimento.”
Te cu awor aki, AA ta sirbi Camaguey, Cienfuegos, Holguin, Santa Clara y Varadero. Sumando havana, awo e ta opera 13 vuelo diario entre Cuba y merca.
Cu esaki, “nos ta bira e prome aerolinea Mericano cu ta ofrece un servicio regular pa e capital Cubano den mas di 50 aña,” Martha Pantin, vocero di AA a bisa.
Desde diaranson, e aerolinea lo bay tin cuatro vuelo diario desde Miami pa Havana y otro for di Charlotte na North Carolina. Casi dos ora despues, Jetblue a manda su prome vuelo di New York pa Havana y for di eynan, lo bay haci e biahe diariamente.
Lo sigui despues e aerolineanan Spirit, Frontier, Delta y Southwest, te cu completa for di aki pa fin di aña 110 vuelo diario, 20 di nan pa Havana.
JetBlue tabata e aerolinea cu a inaugura – dia 31 di Augustus – e prome vuelo comercial di Merca pa Cuba desde 1961. El a sali for di Fort Lauderdale, nort di Miami na Florida y a yega na Santa Clara, den centro di e isla.
“Nos historico prome vuelo a duna inicio na un era nobo den transporte na Cuba y un biaha mas JetBlue lo haci historia,” Robin Hayes, presidente di e empresa a bisa den un comunicado.
Merca y Cuba a reanuda nan conexionnan diplomatico na 2015 y a acorda cu na Februari di e aña aki lo bay recuminsa cu e vuelonan diario entre ambos pais.
Desde 1979 e dos paisnan tabata conecta via vuelonan charter – es decir, gehuur pa agencianan di biahe – cu tabata cumpli cu e demanda. Pero nan tabata hopi costoso.
E embargo di Washington ainda ta prohibi turismo na Cuba, pero e Mericanonan por biaha dentro di otro 12 categoria. Esunnan mas uza ta intercambio cultural of educativo.
Fuente: NTN24