Prome Minister ta encurasha Aruba pa keda den union

0
RBC Juli 2018
Funmiles-2018

Diabierna anochi, na un Misa Sagrado Curason na Savaneta hopi yen, a tuma luga Misa Anual di Consagracion na e dos Curasonnan, E Sagrado Curason di Hesus y Inmaculado Curason di Maria. Monseigneur Luis Seco y Pastoor Andres di Savaneta a haci e Santo Sacrificio di Misa y e Celebracion di Consegracion.
Durante e misa, Prome Minister Evelyn Wever-Croes, mirando tur e dificultadnan cu nos pais ta enfrentando, a consagra nos pais Aruba colocando nos bandera riba e altar na e dos curasonnan. Despues cu e himno di Aruba a wordo canta, Premier di Aruba a entrega un bunita mensahe na tur esnan presente recordando un y tur cu Dios su amor ta uni nos tur como un pueblo.

“Na prome luga mi ta felicita Parokia di Savaneta cu e bunita celebracion di awe pa consagra nos pais na e dos Curasonnan, E Sagrado Curason di Hesus y Inmaculado Curason di Maria.
Un pabien pa e celebracion asina bunita awe nochi, cu ta yena mi cu alimento spiritual cu mi mester pa sigui, y mi ta sigur cu mi ta papia pa nos tur aki cu tambe ta sinti mesun cos.

Ami ta devoto na Mama Maria, y oracion ta un parti esencial di mi dia. Specialmente ora mi ta bay reunionnan importante, mi ta resa un Ave Maria, pa ilumina mi y pa laga mi yega serca esun cu mi mester hiba mi mensahe. Mi ta sinti cu esaki ta hopi poderoso.

Y sinceramente, e oracionnan y alimento spiritual cu mi ta hiba awe di e celebracion aki, ta algo cu mi ta aprecia masha hopi mes. Y cu e consagracion di Aruba awe, mi ta sigur cu Dios lo yuda nos pa supera tur reto.
Nos ta hunto aki, formando e famia grandi di e pueblo di Dios pa consagra nos isla, nos pais Aruba na e dos curasonnan, e Sagrado Curason di Hesus y Inmaculado Curason di Maria.

Nos ta bibando den un tempo cu hopi turbulencia, negativismo y hopi dolor. Cosnan material ta mustra di ta prevalece tur caminda, tambe na Aruba. E spiritualidad ta mustra di ta bay perdi den nos mundo, tambe aki na Aruba. Esey ta haci cu hopi hende ta perde for di bista kico ta e razon di nan bida.

Ohala cu nos por bira mas conciente cu Hesu-Cristo ta e gran amor di Dios pa hende. E amor aki nos tin di contempla, biba si nos kier agrada Su Tata y yega na santidad. Nos tin di stima otro cu e amor cu Cristo a stima nos y laga un banda tur loke ta stroba nos di haci esaki pa nos por biba na paz cu nos mes y cu otro.

Ta mi deseo cu e nificacion di e Dos Curasonnan aki penetra den e mas profundo di nos ser y haci nos bira mas conciente di e balor cu Hesu-Cristo y Mama Maria mester tin den nos bida.

Nos pais ta enfrentando retonan hopi grandi, sinembargo mi tin tur confiansa cu nos lo sa di surpasa tur e retonan aki si nos tin Fe den Dios, si nos tin determinacion y si nos uni. Awe nos a mira con parokianan a uni den e celebracion aki, e union aki lo yuda nos pais tambe progresa.

Mi ta termina cu e deseo pa e comunidad di Aruba por ripiti cada dia di nobo den un solo boz:
Sagrado Curason di hesus, mi ta confia den Bo.
Inmaculada

Curason di Maria, haci mi curason pareu na bo Curason”.

 

Comments

comments

C: Heineken
new india
dvg