Durante un conferencia di prensa cu a tuma luga den sala di conseho di minister, Prome Minister, Mike Eman, a dirigi cu su mes na e comunidad directamente, na e momento cu falta algun ora pa locual tabata un tempestad tropical cu den oranan di merdia, rond di 2’or, a bira un horcan categoria 1, cu lo yega nos isla rond di 4’or pa 5’or di mainta, cual efectonan ta wordo sinti caba. Lo bay sinti hopi awa, biento y tambe olanan grandi. Pa e motibo ey ta importante pa despues cu durante tur e dianan aki tur e pasonan necesario a wordo tuma door di tur e departamentonan cu ta traha hunto, miembronan di Cuerpo Policial, miembronan di Bombero, miembronan di departamentonan tecnico di Gobierno, di salubridad, di Asuntonan Social. Tambe NG’s manera Cruz Cora y awe nochi tambe a caba di haya notificacion cu di parti di Minister di Defensa di Hulanda, a pone Marine Kazerne disponibel, cual lo tin 200 solda, hunto cu Arumil, cu lo ta ubica den marinierskazerne, pendiente pa e situacion cu por bay surgi den e siguiente oranan. Cuerpo Policial tin pa e siguiente 24 ora, 360 polis, 180 pa warda tey y a bin bek traha, entrega nan dianan di ATV, dianan di vakantie pa duna nan servicio, al igual cu Cuerpo di bombero. Di parti di Salubridad a instala 4 post di ambulance y esaki cu tur e facilidadnan tambe di verpleegkundigen, dokternan, pa ta sigur cu nos pais a tuma tur e precaucionan necesario pa prepara. Medionan di comunicacion a duna un tremendo contribucion pa informa nos comunidad di kico ta pasa den otro pais, kico nos por spera den nos pais, pero awo e ora ta practicamente cerca cu mas informacion cu nos por duna na e momentonan aki, ta esunnan cu ta dunando y ta importante pa yega un momento cu ta tuma tur informacion aki, cada un den nan responsabilidad y Gobierno como tambe conciudadanonan, tuma e pasonan tambe ariba esunnan cu a tuma caba durante e dianan aki.
Gobierno ta considera hopi importante cu Gobierno a tuma e pasonan cu ta necesario den coordinacion grandi di parti di Rampenbureau, hunto cu tur e instancianan. Meteo a haci un esfuerzo grandi pa henter nos comunidad, pa debidamente ta na altura, con e tempestad aki ta desaroya, e oranan cu e ta bay yega Aruba, kico lo spera di dje, a yega e momento cu cada un departamento por haya e oportunidad pa bay haci nan trabao riba caya, pa ta pendiente tambe pa e otro responsabilidadnan cu nan tin, pa asina por sigura cu nos isla ta Sali sano y salvo for di e situacion aki. Pa e motibo ey tambe, despues di a haya awe nochi e ultimo briefing riba kico por spera di e tempo y e orario di e tempo aki ta bay yega nos isla, a dicidi cu ta prudente pa departamentonan di Gobierno ta cera mañan te unda servicio ta permiti. Tin servicio cu tin cu continua y logicamente tur esnan cu ta tuma un posicion den tur e trabaonan cu mester wordo haci pa garantisa siguridad di nos pais, felicidad y tambe e salubridad y aspectonan social di nos pais cu tur cu ta forma parti di e ekiponan cu tin un trabao pa haci, logicamente esynan lo keda den nan funcion y e trabao, pero pa mañan e otro departamentonan of parcialmente e departamentonan cu no mester duna un servicio directo den trabaonan cu tin cu wordo haci, no lo wordo habri, pasobra kier tene e trafico riba camindanan limita, pa asina e organizacionnan por haci e trabou den e forma optimal cu kier pa haci.
Ta haci un apelacion tambe na e sector priva pa unda cu por, tambe duna liber pa personal no tin cu subi caya of keda mucho pendiente entre cas y trabao. E ta un momento cu hopi biaha no sa cu certitud cuanto efecto lo tin, cuanto awa lo tin, cuanto biento lo tin. Tur e mapanan ta indica cu pa rond di 5’or di marduga, cu a haci un dip un tiki mas abao, y si esey ta bay continua of no, naturalmente ta duro pa predici di parti di Meteo, cual lo keda monitorea esaki. Pero awor ta cuestion di ora y esey ta haci cu e importancia di concentra riba locual tin cu haci. Durante dia di awe tambe, hunto cu Minister Benny Sevinger y departamentonan di infrastructura di pais Aruba, a bishita tur canal, tur duiker cu mester yuda pa transporta e awa pa lama, pa asina no haya acumulacion y inundacion, por bisa cu tur tabata den bon condicion. Nan a wordo haci limpi. Es decir cu e infrastructura di nos pais, tambe a wordo haci optimal pa por atende cu e reto aki. Naturalmente ta depende di con grandi e horcan lo bay ta, con lihe e awa lo move, pero sigur un trabao grandi a wordo haci pa Aruba por supera den mihor forma e reto cu ta bin cu un tempestad, si e bin, den e condicionnan cu por causa inundacionnan y otro retonan pa nos pais.
Ta spera naturalmente cu esey lo no ta e caso, pero ta bisa cu miho ta bon prepara cu despues lamenta. Pa e motibo ey a haci tur cos cu tabata tin riba e lista pa haci como organizacionnan di Gobierno cu a wordo encarga cu preparacion di un momento asina y pa Gobierno ta importante tambe pa na e momentonan aki cu ta bay yega cu e awa ta yega, e biento lo subi y e partinan tambe di locual ta trata nos costanan ta bay mira tur e efectonan pa toch tuma un momento un rato di reflexion, di e sentido di convivencia di cada un di nos.
Prome Minister a splica cu a experiencia momentonan di inundacion grandi. E mes a cana un biaha di 2’or di marduga, cuminzando for di 6’or di atardi, pa e siguiente dia den Madiki, ora cu tabata tin un inundacion enormemente grandi y tin cu bisa cu naturalmente e trabao di polis ta esencial. E trabao di bombero ta esencial, e trabao di marina cu a yega tambe den cierto ora, ta esencial, pero nada ta supera e trabao cu bisiña cu bisiña por haci. Ora cu a cana casnan caminda cu ta bisiñanan a bin bisa cu den un cas tin un hende grandi, e ta riba rolstoel y ora cu a kibra porta habri, a haya e meneer riba rolstoel sinta y awa tabata na su garganta caba y si no tabata pa bisiñanan cu tin e informacion ey, algo por a pasa cu e persona aki y asina tabata tin cantidad di momento cu a mira cu e rol di bisiña pa bisiña ta hopi esencial.
A haci e preparacion como Gobierno, polis tey, Brandweer tey, marina tey, departamentonan di salubridad, social tey, pero tin un rol tambe pa nos tur como bon ciudadano. Nos conoce den nos bario ken ta e hende grandi, un persona cu handicap, kende ta biba den un cas den condicion fisico cu ta menos fuerte pa atende cu un yobida grandi of cualkier otro tempestad. Laga nos ta hopi conciente di esnan rond di nos, nos famianan y nos bisiñanan. E ora nos ta sigur cu hunto cu sector publico, hunto cu Cruz Cora, hunto cu marina, cu polis, bombero y salubridad y tur otro instancia cu ta traha hunto cu Gobierno, sigur sigur cu poder di Dios y cu bendicion di nos creador, lo Sali for di e situacion aki, na un manera cu nos por wak bek cu nos a surpas’e y cu nos por wak bek sin motibo pa lamenta, segun prome minister.
Awe a papia cu prome minister di St. Lucia, kende a informa cu St. Lucia a keda sin awa, a keda sin coriente pa un tempo largo. Tabata tin speculacion na Aruba cu lo baha WEB, cual no ta e caso. Pero riba un isla manera St. Lucia, ta e tempestad a baha e utilidad y esey toch ta duna indicacion cu bo mester haci preparacion y ta importante pa nos realisa cu naturalesa ta algo cu hopi forsa y por haci tur preparacion pe. Pero finalmente kico ta bin riba nos ta dicidi con nos por absorb’e y con nos por maneh’e. Esey ta importante pa nos tur ta prepara, pa ta uni den esaki. E pronosticonan no ta alarmante, e no ta un horcan cu ta bin directamente riba Aruba di categoria 3 of 4. E ta un horcan di categoria 1 cu ta pasa basta panort di Aruba. Sin embargo a yega di mira mas cos den pasado. Horcan a pasa poco leu y banda pazuid ta haya un tormenta hopi pisa. Esey kiermen cu nos mester ta hopi conciente di locual ta biniendo y prepara y a haci preparacion. Prensa a yuda grandemente den e preparacion aki y p’esey awe nochi tambe ta duna e ultimo informacion.
Prome Minister a splica cu e departamentonan di gobierno lo ta cera, un biaha mas ta pidi sector priva pa coopera pa asina mañan tur cuerpo cu ta opera, cu un ke otro tarea pa nos por traspasa e momento aki, por traha cu tur trankilidad y cu tur eficiencia, segun e prome Mandatario.