Awe a tene un reunion cu diferente parti cu ta forma parti di e grupo cu ta cay bao di guia di Rampenbureau, na momento cu ta premira cu por tin desaroyonan cu ta rekeri e organisacion di hopi diferente departamento pa atende cu cualkier reto, cualkier peliger di un calamidad. Ta cuminsa pone e departamentonan aki traha hunto y pa cuminsa na bisa, prome minister a splica cu ta un palabra grandi ora ta bisa cu bo ta activa e Rampenbureau y e plan, ta ora cu e situacion ta rekeri esey y esey no ta e caso na e momentonan aki. Sinembargo mirando cu tin un tempo den desaroyo cu ta wordo pronostica pa yega Aruba entre diahuebs y diabierna, e tabata importante pa Rampenbureau, hunto cu KPA, Salubridad Publico, Brandweer y Servicio Meteorologico, tuma e pasonan necesario den e dianan aki pa haci preparacionnan.
Prome Minister a duna e ultimo informacionnan di Meteo y toch tambe duna un splicacion chikito.
Dialuna, minister Otmar Oduber y prome Minister Eman, a haci diferente palabracion pa mira con por structura e informacionnan cu ta sali for di Servicio Meteorologico na un forma cu ta keda toch bon pa e publico ta bon informa y a dicidi cu cada tanto ora Meteo lo duna informacion y naturalmente ta compronde cu prensa mey mey di e informacionnan ey tambe kier mas informacion. Pero Meteo cada biaha kier haci e assessmentnan a base di datonan nobo cu nan ta haya prome cu nan por duna e siguiente relato nobo.
Ta pidi tambe e ora ey miembronan di prensa pa tene comprension pa e hecho cu Meteo ta traha segun structura cu nan ta acumula informacion prome for di diferente fuente y pa despues por saca un boletin oficial pa duna e ultimo datonan riba e tempo.
A caba di haya un briefing riba e ultimo informacion di e tempo cu tur hende tin wowo riba dje.
Segun prome minister, por ta ta bon pa duna informacion riba e palabracionnan cu a haci riba e informacion cu ta suministra y e canalnan cu ta bay dunando e informacion.
Desde dialuna cu e tempo aki a cuminsa desaroya, a palabra pa locual ta trata e trabaonan cu Servicio Meteorologico ta haci, Minister Oduber y Prome Minister, cu Meteo lo duna informacion regular na nos comunidad, pa asina nos comunidad sa kico ta pasando y con e tempo aki ta desaroya. Na e mesun momento, di parti di Rampenbureau, a cuminsa tuma e precaucionnan cu ta tuma na diferente nivel. Tin diferente nivel cu ta escala segun cu e situacion por bira mas of menos emergente.
E situacion a pone cu en todo caso a cuminsa trece tur e diferente departamento y ministerionan hunto pa analisa e situacion a base di locual cu ta drentando di Meteo. Esey a cuminsa caba durante di e ultimo 48 oranan, cu e departamentonan aki ta bezig hunto y diferente precaucionnan a wordo tuma caba pa locual ta trata e experiencia cu Aruba tin cu tipo di tempestadnan asina. Uno di mas grandi cu nos a conoce cu ta e inundacion di awa cu hopi biaha nos infrastructura como pais no ta prepara pa un cantidad grandi asina di awa cu ta yega pareu, sin papia ora cu ta biba temponan ainda mas bruto cu lama, cu biento, pero hopi awasero mes, ya caba ta pone pais Aruba dilanti di hopi reto y nos tin experiencia den esey y ta pa e motibo ey tin un cantidad di cosnan cu a haci, anticipando caba riba cu bo por haya situacionnan di hopi awa.
Un di nan ta DOW. DOW ta tuma precaucionnan hopi tempran, na momento cu situacionnan asina ta mustra di por bay yega Aruba, pa haci tur e rooinan limpi, pa mira cu tur e sistemanan pa awa por core ta liber, ta limpi, pa e awa por core y ya caba DOW ta haciendo esey. DOW ta den full preparacion tambe cu tur locual tin di haber cu ekiponan cu tin mester pa atende cu situacionnan asina, por ehempel nan 4×4, ta wordo yama for di diferente dienst pa ta na un luga central, caminda cu DOW tin un organisacion pa maneha esaki. Tambe palabracionnan cu stacionnan di pomp ta wordo haci. Ta cuminsa señal cu algo por bay sosode. Tin un rampenplan cu ta defini exactamente na momento cu algo bay sosode, tal instancia tin cu haci tal cos. Tal sector priva ta coopera den tal cos. Tur e diferente pasonan cu mester tuma den un caso asina, ta defini caba. Ta simplemente tin cu activa cada un di e instancianan ey y bisa cu awor a yega na tal nivel di desaroyo cu ta haci un apelacion pa cuminsa prepara e pasonan cu ta responsabel pe.
Tambe conoce un di e demandanan hopi grandi cu semper tin na ocasionnan asina di inundacion, cu ta e pompnan. Brandweer ta provee cu mayoria di e pompnan, pero tin partinan den sector priva, cu ta contribui y ta fia pomp. Tur paso ta wordo tuma, tanto di brandweer y DOW pa por tambe drenta den contacto cu e diferente instancianan cu por yuda expande e capacidad di pomp cu tin y si esakinan ta bay bira necesario.
Pa locual ta trata tur esnan cu ta bay traha, hopi biaha ta bira 24/48 ora, pasobra nan tin cu come. Galloway ta yuda cu cumindanan specificamente pa esnan cu ta traha. Gobierno a activa tambe e contacto cu sociale zaken pa prepara di nan parti e inventarisacion di posibel shelternan, si esakinan ta bay bira necesario, cuanto nos tin, con nan condicionnan ta y polis tambe ta den full preparacion. Polis a haci caba e trabaonan necesario pa e cuerpo ta na altura cu eventualmente por haci un apelacion riba nan pa nan ta standby. Esey tambe ta algo hopi importante pa yuda tene e orden publico na momento cu tin situacionnan asina.
Barionan cu tin wowo special riba dje, ta basa riba experiencia, Madiki, Weststraat, Zeewijk, Pos Chikito, areanan di hotel, hotelnan manera Tamarijn, Divi Divi. Tambe den e areanan manera Arashi, tin desaroyonan nobo. Instancianan manera AHATA, ATA ta wordo puntra pa yuda specialmente ora tin cu trata cu turistanan cu por ta cu mester wordo reubica y asina ta trahando cada biaha dunando un paso un tiki mas na e nivel di escala y diaranson lo tin un reunion di Rampenbureau, hunto cu KIA y polis y mainta tambe lo tin e inicio nobo di e ultimo desaroyonan di tempo. Esey lo sali banda di 11’or y mey di mainta. Locual a palabra cu minister Oduber ta cu en caso cu tin algo cu toch ta desaroyando mas lihe cu notificacion tin cu sali mas tempran, lo haya sa e ora ey di parti di Meteo, cu ta dunando tur cooperacion cu tin mester. Ta aprecia tambe tur e informacionnan cu medionan di comunicacion ta comparti cu nos comunidad. Miho nos comunidad ta bon prepara. No mester tin panico, pero bon preparacion sigur semper ta yuda y pa tur hende ta informa tambe si un situacion bira cu nos tin cu activa rampenbureau, lo ta operando for di SETAR, e edificio cu a wordo poni disponibel tambe pa e trabaonan ey tuma luga.
Na e momentonan aki, prome Minister a accentua, indicacionnan no ta suficiente cu por activa Rampenbureau, pero si ta activo, pero no den e palabra formal di a activa Rampenbureau, pero ta activo haciendo preparacionnan si pa ta bon prepara pa cualkier eventualidad. Prome Minister a expresa palabranan di gratitud na Jaime Donata, kende tabata riba pensioen cu algun siman pasa a yam’e puntr’e si e ta dispuesto pa toch coopera cu esnan cu ta na Rampenbureau tambe, cu sigur ta sinti su falta y sr. Donata a pone su mes disponibel y no a pensa cu asina lihe e lo a haya su mes caba den un accion y sigur sr. Rino Hermans kende ta waarnemer Hoofd, ta aprecia tambe e apoyo di sr. Donata.
Prome Minister a reconoce tambe sr. Rino Hermans di Rampenbureau, Vanessa Chong di KPA, Maureen Dirksz di KPA, Sharline Koolman di Despa, Jerry Staring di Despa, Ferdinand Ponson di Brandweer, Gino Tromp di Brandweer, comandante Eduard de Cuba, di Brandweer, Sr. Jaime Donata di Rampenbureau, Marck Oduber di Meteo y minister Otmar Oduber, hunto ta reuniendo y tumando e precaucionnan necesario pa asina nos comunidad ta informa.