Algun siman leu for di loke ta bay ta e apertura di e di dos facilidad Multifuncional (MFA) na Aruba, Prome Minister a reuni diahuebs atardi cu e, asina yama, ‘Klankbordgroep’ cu a forma pa Paradera. E grupo aki ta consisti di habitantenan di e bario mes cu, boluntariamente, ta asisti, guia gerencia di MFA pa mantene un contacto cu e bario y tur esnan cu ta haci uzo di e facilidad. E momento tabata oportuno tambe pa contratista haci un presentacion di tur e trabounan haci y tambe anuncia e persona cu lo fungi como manager di MFA Paradera, esta sr. Elton Hart.
Premier Eman y miembronan di e grupo a haya un splicacion di e bunita edificio, tur su caracteristicanan di seguridad y tambe acceso pa personanan cu incapacidad fisico, for di representante di Bic N.V./Thiel Corporation, sr. David Britten. E edificio di dos piso ta un diseño di arkitecto Arubiano ir. Joël Croes. E ta conta cu portanan cu ta contene candela, sistema di airco cu ta ahusta automaticamente den cada espacio y tambe bañonan adapta pa facil di uzo pa personanan, p.e. den rolstoel.
MFA Paradera, ubica algun meter pariba di e rotonde y na otro banda di caminda di unda actualmente e Oficina Auxiliar di Gobierno (Hulpbestuurskantoor) di Paradera ta situa, ta bay acomoda no solamente e departamento publico aki, cu tur su servicionan, pero tambe oficina di Servicio di Impuesto, Biblioteca, Cafetaria y segun plan un ATM y otro servicionan.
E maneho diario di e facilidad y tur su ocupantenan lo ta den man di sr. Hart kende ta bin for di e sector social y ta un habitante di Paradera su mes, mescos cu su famia completo. Su seleccion ta cuadra cu e pensamento di MFA pa involucra mas tanto profesional y otro ciudadanonan di e bario, ya cu nan conoce miho kico ta e deseo y pensamento di e districto.
Minister President Mike Eman a duna di conoce cu pronto lo tin entrega oficial di yabinan di e edificio y despues di finalisa algun di e detayenan cu falta y pa e diferente departamentonan muda, ta premira cu e apertura oficial di e di dos MFA riba nos isla lo ta den luna di october proximo. Despues di Noord y Paradera, e siguiente MFA lo ta esun di Savaneta, sigui pa Santa Cruz y San Nicolas.