Diadomingo ultimo, 18 Maart, minister Glenbert Croes a reuni cu sindicato STA y delegadonan di ASTEC, cu caracter di urgencia. Esaki ta door di e conflicto na waf cu por tin su consecuencianan grandi pa economia di Aruba, cu e por paralisa ASTEC y paralisa waf. Minister di Labor, Sr. Glenbert Croes ta amplia.
Como minister di Labor, Sr. Croes a atende sindicato STA y el a haci un apelacion ariba ASTEC, ariba APA, pa sinta na mesa cu STA, ariba puntonan di diferencia entre sindicato y trahadonan, y companianan como dunado di trabao. Interes di Aruba ta fundamental, como gobierno pro trahado, nan kier pa sensatez prevalece den e discusionnan, negociacionnan, posibel conflictonan cu ta surgi, loke semper Sr. Croes ta kere den dje, ta pa e problemanan aki, pa atende cu nan. No bira lomba pa e problemanan aki, confronta e discusionnan pa asina entre trahadonan y doño di trabao por yega na un solucion.
ASTEC tin un rol hunto cu APA cu ta fundamental pa economia di Aruba y ta momento cu APA y ASTEC mester purba yega na un comprondemento pa evita lo peor. Di su banda, Sr. Croes a priminti di, a pesar cu e lo ta na Hulanda, e lo ta den contacto cu e sindicatonan riba desaroyo di e situacionnan. Y si dado momento, ripara cu no ta yega na solucion, ora cu e minister ta bek, e lo convoca tur e partidonan na mesa, y asina pone un presion positivo, pa tur hende yega na un comprondemento y convivencia cu ta sirbi interes economico di nos pais.
Mester compronde cu Aruba su costo di bida ta caro y e servicionan di ASTEC y APA ta birando hopi caro pa e pueblo di Aruba sigui carga. Loke mas ta desea ta pa tin paz den e companianan aki, cu nan trahadonan cu tambe ta pueblo, pa locual Sr. Croes lo keda pendiente y ohala den e siman cu e ta ausente, lo por tin un solucion.