BILTHOVEN, Hulanda – Pa prome biaha den hopi aña un Hulandes a wordo contagia cu e virus di polio. Esaki a sosode den un laboratorio na Bilthoven. E homber ta sinta den cuarentena pa evita cu e contagia otro hende.
E homber a wordo contagia den un incidente den e laboratorio di Bilhoven Biologicals (Bbio). Ora cu e virus a keda liber, un otro trahado tabata presente, pero esaki si no a keda contagia. E contagio a keda divulga pa secretario di estado di Salubridad, Martin van Rijn.
Vacuna
Segun van Rijn, e chens ta chikito cu e homber ta berdaderamente malo door di e virus, pasobra e ta vacuna.
Tambe su compañeronan di cas ta vacuna. E homber ta sinta na cas, wardando pa e virus cu tin den su curpa disipa dentro di algun siman. E ta wordo bon monitoria cu testnan frecuente pa mira si e ta sigur cu e por drenta den contacto cu otro hende.
Kico ta polio?
Plio ta un malesa altamente contagioso. Hendenan cu haya e malesa aki, por bira lam, cu varios caracteristica cu tin biaha ta yega na morto, cual informacion por wordo mira riba e website di RIVM. Na Hulanda hendenan ta wordo vacuna contra di e virus cu ta causa polio.
E ultimo epidemia di polio na Hulanda a tuma luga, segun RIVM, na 1992/1993, bao di esnan cu no a wordo vacuna.
Fuente: RTL Nieuws