E campeonato nacional di trefbal mucha muher entre scolnan di Enseñansa Basico organisa pa IBiSA a cuminsa dialuna atardi den Centro Deportivo Libertador Betico Croes na Sta Cruz. A forma cinco poule den cual a reparti e scolnan cu a inscribi pa participa na e competencia.
Den poule A ta participa Prinses Amalia Basisschool, St. Michael/Colegio Cristo Rey y St. Anna School. Poule B ta consisti di Bon Bini College, Fatima College y Colegio Laura Wernet Paskel. E scolnan den poule C ta Scol Basico Washington, Colegio San Hose y Colegio Sagrado Curason. Mientras cu den poule D tin Cacique Macuarima School, St. Franciscus College y Colegio Pastor Kranwinkel y den poule E, Mon Plaisir School, St. Dominicus College y Maria School.
Dos cancha a keda prepara den Centro Deportivo Betico Croes pa e prome weganan di trefbal. Riba e prome dia a hunga weganan den poule A y poule B. E prome weganan cu mester a tuma lugar riba veld 1 y veld 2, no a tuma lugar pa motibo cu un school no a presenta y e otro school no a logra cera e cantidad di hungado pa forma un team y hunga. Automaticamente Prinses Amalia Basisschool y Bon Bini College ta gana nan prome wega y asina ta pasa pa e siguiente wega.
E muchanan di Bon Bini College a hunga e siguiente wega riba veld 2 contra e muchanan di Colegio Laura Wernet Paskel. Mientras cu riba veld 1, Prinses Amalia Basisschool a midi forsa contra St. Anna School. Apesar di e calor, e muchanan tabata bastante entusiasma pa e weganan y nan a bataya fuerte contra otro pa nan scol por sigui den e campeonato. Riba veld 1 Prinses Amalia Basisschool ta gana Sta Anna School cu e score di 16-7, mientras cu riba veld 2, Bon Bini College ta gana Colegio Laura Wernet Paskel cu e score di 17-10.
Tin di remarca por cierto cu e aña aki, e competencia di e weganan ta completamente diferente cu añanan anterior. E aña aki e scolnan no ta enfrenta otro den poulenan forma segun nan districto, sino tur scol ta enfrenta otro pa asina segun weganan gana yega na e final nacional y mira cua scol ta bira e campeon nacional di Aruba, den e caso aki di trefbal.
E weganan ta sigui durante henter siman, cuminsando pa 3’or di atardi entre e scolnan cu ta forma e otro poulenan. IBiSA ta gradici tur scol pa nan participacion na e campeonato nacional di trefbal e aña aki y ta desea tur scol hopi exito.