Recientemente, riba diadomingo 25 di maart 2018, a tuma luga e 1e campeonato di Aruba Karate Bond na Compleho Deportivo Frans Figaroa.
E campeonato tabata uno exitoso cu participacion di e scolnan di karate: Dojo Konishi, Dojo Shoshinkai, Shotokai Aruba dojo Shocokan, Dojo Gyoseki kan, Dojo Shibumi, Dojo Makotokan y Aruba Karate Institute. Un total di 55 karateka a participa den 16 diferente categoria. E campeonato –e biaha aki- a ranca sali cu e karatekanan di e grado di mas halto kendenan a presenta prome.
Karateknan di faha bruin a haci nan maximo esfuerzo dilanti di e refereenan local y dos referee internacional, esta ‘Sensei’ Yanis Venizelos Collado di Venezuela y ‘Sensei’ Kenneth Gaari di Corsou. Na mes momento, e karatekanan di faha bruin a presenta dilanti diferente representante di COA y ASU tambe. Cada uno mester a demostra un bon dominio di nan tecnica, concentracion y precision. Despues a sigui avansa cu e otro categorianan segun nan respectivo grado y edad. Publico presente a gosa di varios bunita ‘kata’ (combate imaginario tecnico). Aki aya tabata tin algun grito y bulamento durante di e combatenan cu tabata intenso. Durante henter e campeonato, e dos referee internacional, esta ‘Sensei’ Yanis Venizel os Collado di Venezuela y ‘Sensei’ Kenneth Gaari di Corsou a yuda den instruccion di nos refereenan local. Esaki tabata un oportunidad pa asina eleva – mas aun- e nivel di nos propio refereenan y instructornan di karate. Un pabien ta bay pa tur karateka medayista.
Igualmente Aruba Karate Bond ta felicita tur karateka cu a participa na e campeonato. Esfuerso y dedicacion ta conta tur momento aunke no a logra un medaya. Aruba Karate Bond, bou di presidencia di Sensei Felix Tromp y señora Desiree Helder, ta gradici su directiva, tur sensei, tur coach, tur karateka, tur mayor y tur boluntario cu a participa na e campeonato. Un danki special ta bay pa Minister di Turismo, Salubridad Publico y Deporte – señor Dangui Oduber, Comite Olimpico Aruba (COA), Aruba Sport Unie (ASU), Sport Subsidiecommissie Aruba (SSA) y Lotto pa Deporte cu ta sostene karate na Aruba.