E siman aki 4 Minister a uni hunto y a firma un Decreto Ministerial caminda cu ta institui un Task Force encarga pa actua y percura cu ordo ta wordo reestableci riba nos beachnan.
Adhunto e Decreto Ministerial cu ta indica formacion oficial di e Task Force entrante 19 di januari cu ta consisti di e siguiente departamentonan: KPA, DIP, DOW y Directie Scheepvaart.
E tareanan di e Task Force Beach Policy ta encera: Organisacion di accionnan multi disciplinario regularmente pa di e forma aki controla y percura cu e maneho di Beach Policy ta wordo aplica y cu esunnan cu ta opera riba beach ta sigui e condicionnan stipula den nan contract. E Task Force lo crea un red di notificacion pa por percura pa tin un enfoke integral. Lo inventarisa y mantene record di tur accion cu wordo tuma relaciona cu cada operador di watersport y otro operadornan riba beach. Tambe lo conseha Ministernan y departamentonan concerni tocante di posibel ahustacionnan den caso cu ta necesario pa loke ta e condicionnan y of maneho. Finalmente e Task Force lo tin como encargo tur locual cu ta encera maneho y garantia di ordo y siguridad riba nos beachnan y lama.
E decision pa forma un Task Force a bin despues cu Minister di Infrastructura, Minister di Turismo, Minister di Husticia, Minister di Transporte y departamentonan concerni a reuni den siman pa busca solucion pa e ultimo sosedidonan cu a tuma lugar riba nos beachnan. E maneho di ‘3 strikes you’re out’ ta siguiendo su curso y lo no tolera ningun acto sin respet riba nos beachnan.