E status di mucha muhe na Aruba a mehora substancialmente; mas cu nunca mucha muhenan ta hayando educacion, tin mas mucha muhe ta participa den diferente deporte y organisacionnan, mucha muhenan na Aruba tin un bos. Pero esey no kiermen cu nos ta caminda nos mester ta.
Mucha muhenan ainda no ta envolvi y conecta den tur ramo di estudio (ciencia y matematica). Algun mucha muhe ainda ta victima di violencia domestico, abuso fisico y sexual, bullying, prehuicio contra hende muhe y standardnan dobel y discriminatorio.
Nos ta trahando riba conscientisacion cu na Aruba ainda tin desigualdad contra mucha muhe, trahando cu organisacionnan cu ta traha cu mucha muhe y programanan manera Mi Ruman Grandi, tur ta yuda na mehora e futuro di nos mucha muhenan. Puntra un mucha muhe con su dia a bay y con bo por yud’e logra su metanan den educacion. Ora un mucha muhe logra, nos tur ta logra
Den cuadro di dia Internacional di mucha muhe y celebracion di Luna di Enseñansa, Ministerio di Enseñansa tin e honor di invita comunidad di Aruba na un evento dedica na mucha muhe y educacion hunto cu un screening oficial di e documentario “He named me Malala”. E evento special aki lo tuma luga diasabra 22 di october di 6:00pm pa 10:00pm na Cas di Cultura. Pa registracion manda un email cu specificacion di nomber na [email protected]