Cuerpo Policial na Februari 2015 a cuminsa cu un programa estilo “Ruman Grandi”, unda cu nan a “adopta” Imeldahof como nan proyecto. E polisnan envolvi ta bishita e muchanan, nan ta combersa cu nan, brinda nan guia y ta organisa actividadnan special pa nan.
Recientemente, lider di e proyecto, esta Vocero di Polis Lito Lacle, a invita e artista Jeon pa bishita Imeldahof como parti di nan programa pa introduci e muchanan na diferente rolemodel y inspira nan pa tin speransa, pa persevera y enfoca riba nan futuro y enseñansa. Jeon a dicidi di agrega na su bishita, invitando Ritmo Real pa compañ’e y asina haci di e encuentro uno ainda mas special pa e hobennan.
Masha hopi talento a bin dilanti entre e muchanan, Lacle a expresa.
Jeon a comenta cu e muchanan ta semper hopi respetuoso, y ta trat’e manera ta su cas el a yega. Nan a canta poco cantica hunto y a combersa cu e muchanan, contestando tur nan preguntanan y encurashando nan pa traha duro y no perde e enfoke riba nan futuro.
Di su parti Jeon a keda sorprendi y na mesun momento encanta cu e hobennan tabata sa e letranan di tur e canticanan for di memoria, y esaki a conta tanto pa su canticanan como esunnan di rapper Ritmo Real, cual ta mas dificil. E artista a agrega cu el a splica e hobennan tambe con tempo e tabata bay Cayena Kleuterschool como mucha chikito e tabata hunga den e mesun hardin unda cu e muchanan ta hunga awendia. Tabata un “feeling great” pa canta cu nan y scucha nan canta tur e canticanan, Jeon a expresa.
Ritmo Real a disfruta di e encuentro special. Su canticanan sin duda ta hopi popular entre e muchanan, kende tabata sa tur e letranan y a pidi tambe pa algun cantica. Ritmo tambe a disfruta enormemente di e intercambio cu e hobennan.