Algun aña pasa, Minister Mike Eman, a firma un MOU cu e Universidad di e Districtro di Columbia na Washington DC pa e motibo cu e Universidad tin un facultad hopi renombra na Merca pa e diferente modelo den sistemanan di Agricultura sostenibel pero den centro di ciudad y areanan urbano. E idea aki ta cuadra cu e vision y deseo di e Gobierno di Aruba, cual ta produci den tur areanan posibel pa crea un siguridad di cuminda como tambe oportunidad di trabou den e ramo aki.
Na October 2015, un delegacion chikito di Santa Rosa, encabeza pa e Directora, Sra. Nathalie Maduro, a biaha pa Washington DC y a hasi un bishita extensivo den cual a cera conoci cu e diferente areanan di estudio den e ramo aki y tambe a bishita e diferente proyectonan urbano den cual e maneho di Agricultura urbano ya ta wordo implementa exitosamente.
Recientemente, Profesor Ralph Belton, encarga cu e Facultad di Arquitectura y kende porcierto ta naci tambe na Aruba, a bishita Aruba, pa bin haci un sondeo di kico ta e diferente oportunidadnan cu Aruba ta ofrece pa establece proyectonan di Agricultura urbano den centro di Oranjestad y otro areanan na Aruba caminda cu normalmente no tin custumber pa produci pero cu tin un concentracion halto di habitante of usarionan di e localidadnan, cu semper lo por beneficia di e produccionan aki.
Awendia di sistemanan manera Hydroponics, Aquaponics, Aeroponic, Vertical farming, Rooftop farming etc cual ta sistemanan moderno den cual por produci un cantidad halto di producto pero sin interferi cu e desaroyo di e espacio. Por inclui tambe sistemanan di energia renobabel mediante solar panels of windchargers, cerando e circulo completo pa locual ta sostenibilidad di henter e proyecto.
Di acuerdo cu Sra. Maduro, Directora di Santa Rosa, “Nos mester cuminsa studia e posibilidad di e introduccion di sistemanan modernisa cu por yuda nos Aruba yega na un siguridad di cuminda a largo plazo, a pesar di tur e retonan cu tereno y awa cu nos por tin. Esakinan ta sistemanan nobo y cu lo rekeri cambio den nos manera di planifica, sin embargo, si tur hende reconoce e balor agrega na e introducion di e tipo di modelonan aki den nan proyectonan, no solamente lo nos conta cu edificionan cubri cu areanan berde cu lo yuda mantene e calor den e edificio mas abou, pero tambe lo por ofrece un cantidad di productonan fresco pa consumo y otro oportunidad di negoshi pa esnan interesa di haci uso di e espacionan aki pa produci.”
Durante su bishita na Aruba, Profesor Belton a duna un presentacion na Minister President, Sr. mr. Mike Eman conhuntamente cu Minister Ing. Benny Sevinger. Tambe a reuni cu e ejectivonan di Santa Rosa y Infra Team pa “brainstorm” encuanto di e posibel solucion y remodelacion di un edificio den centro di Oranjestad cu lo por bay bira e “edificio modelo” como introduccion di e concepto aki na Aruba. Prof. Belton a haci un bishita tambe na Santa Rosa, caminda el a duna un presentacion encuanto di e henter e sistema y con esaki lo por beneficia Agricultura den futuro na Aruba.
Pa sigura cu e ta comparti su conocemento cu nos studiantenan, Prof. Belton a duna un charla na e studiantenan di EPI (Sector Tecnico) caminda cu el a splica encuanto di e concepto di Agricultura Urbano mediante e uso di espacio y edificionan urbano. Tambe el a splica encuanto di e Universidad mes y kico esaki lo por ofrece na esnan cu ta desea di bay sigui nan estudio den e ramo aki. Esaki sigur ta un di e metanan principal di Santa Rosa, pa yuda concientisa y motiva nos studiantenan pa scoge un estudio avansa den e tecnologianan moderno den Agricultura.
Otro bishitanan cu Prof. Belton a haci durante su estadia, tabata cerca di Sr. Glenn Thode encarga cu Universidad di Aruba, caminda cu a combersa ariba e diferente oportunidad nan con e dos Universidadnan por traha hunto den futuro, den cuadro di e planes nan cu tin pa establece un “Green Faculty” na Universidad di Aruba. Tambe el a reuni cu Sra. Astrid Britten y Sr. Ronny Alders na Biblioteca Nacional pa haya mas informacion encuanto di e “Green Educational Symposium. Por ultimo Prof. Belton a reuni cu Sr. Frank Hoevertsz y su team na Utilities NV caminda cu a combersa referente e diferente sistemanan moderno den Agricultura y uso di awa recicla. A toca e tema tambe uso di “waste” cu por yuda pa crea energia y compost cual awendia ta just wordo kima na dump.
E siguiente paso awor lo ta, pa Profesor Belton traha un rapport di e diferente oportunidad cu por a señala y conhuntamente cu su team di coleganan experto y studiantenan di e Universidad, lo haci un estudio y crea un plan lo wordo entrega na Gobierno di Aruba, creando asina e di prome edifico completamente sostenibel cu por produci usando energia natural y cu por yuda pa motiva studiantenan y specialmente nos entrepeneurnan local pa considera e tipo di proyectonan aki como un posibel negoshi.
Adhunto por aprecia algun potret di e bishita di Profesor Belton na Aruba. Danki na tur cu a coopera cu Santa Rosa Aruba cu nan participacion y cooperacion durante e bishita di Prof. Belton.