WASHINGTON D.C., Merca – E homber yama “Prediction Professor” door di precisamente ta predici den cada eleccion presidencial desde 1984, incluyendo e eleccion di 2016, awo ta prediciendo e “impeachment” (condena) di e presidente electo, Donald Trump.
“Tin un bon chens cu Donald Trump por enfrenta impeachment,” Allan Lichtman a bisa Erin Burnett den e programa “Erin Burnett OutFront.”
Lichtman, un historiado politico cu ta duna les na e American University na Washington, a bisa cu e ta uza su mesun sistema di 13 declaracion berdadero y falso pa husga sea cu e partido titular lo retene Cas Blanco. Sinembargo, ora cu ta bin na e prediccion di un “Trump Impeachment”, el a conta Burnett cu esey ta basa riba su instintonan.
“Na prome luga, atrabes di su bida el a hunga lihe y hopi los cu ley,” Lichtman a bisa. “El a maneha un recaudacion di fondo ilegal den e estado di New York. El a haci un contribucion ilegal na campaña atrabes di caridad. El a uza caridad pa paga debenan personal. E ta enfrentando un “RICO lawsuit”.
Burnett a hala atras riba e demanda di Lichtman, notando cu su alegacionnan no a wordo proba den corte y a sigui puntre dicon e ta pensa cu Trump por wordo condena ora cu e Republicanonan tin tanto e Cas y Senado.
“E Republicanonan ta nervioso riba Donald Trump,” Lichtman a bisa. “E ta riba un rienda suelta. Ningun hende sa kico realmente e ta kere aden of unda relamente e ta para. E no por wordo controla. E Republicanonan lo prefera pa tin Mike Pence, un Republicano conservativo absolutamente predicibel.”
Fuente: CNN Politics