IMG_2054

Presidente di Comision di Celebracion di Dianan Nacional, Robert Maduro durante e conferencia di prensa unda cu Minister di Cultura a introduci e programa pa celebracion di nos Luna Nacional, a splica cu di parti di Gobierno lo provee un calendario cu tur actividad di e fin di siman grandi di Dia di Himno y Bandera. E calendario aki ta inclui tur actividad musical, cultural, social y deportivo tumando luga di dia 15 pa dia 18 di maart y asina comunidad di Aruba por planea nan dia pa bishita un of mas di e eventonan tumando luga. Pa loke ta e gran concierto di diadomingo, dia 17 di maart, Robert Maduro a gradici Minister di Cultura, Michelle Hooyboer-Winklaar pa e confiansa den e calidad di e programa y pa tur su apoyo den e realisacion di e proyecto aki. Maduro a splica cu lo tin diferente tentnan di cuminda, bebida, artesania, obra di man y obranan local pa asina completa e ambiente dushi cu lo tin riba Plaza Betico Croes e anochi di e concierto aki.

Pa realisa e actividad aki a conta cu diferente “joint venture”, cual uno ta cu Tropical Bottling Company, kende ta agencia di refresco Coca Cola, Sprite, refresconan di color Tropical, Malta Balashi y cerbesnan Balashi y Chill. Gerente di mercadeo di Tropical Bottling Company, Vanessa Hollander a expresa cu ta cu hopi orguyo e compania nacional cu productonan cu ta wordo produci na Aruba, ta contribui na un concierto cu tabatin un impacto masha grandi y cu ta wordo ripiti awo pa comunidad di Aruba henter por disfruta di dje. Un celebracion nacional ta merece e apoyo di productonan nacional y asina tin un union pa logra un dia bunita asina, segun Hollander. Di nos e talentonan ta y di nos e productonan ta, el a subraya. Hollander a añadi cu Tropical Bottling Company ta para fuerte cu su productonan nacional tras di eventonan asina’ki y lo tin diferente stand riba Plaza  Betico Croes pa ofrece tur nan productonan na e publico e anochi aki.