Durante e bishita recien di Minister di Husticia, Arthur Dowers, na e Instituto Coreccional (KIA), a pasa na e seccion di e instituto caminda e detenidonan ta wardando riba nan castigo, conoci como “Huis van Bewaring”.
A conclui e renobacion di e huis van bewaring, faltando algun detaye ainda den e area di recreo caminda cu e personal di e instituto lo por guia e detenidonan hopi mas organisa na momento di ricibi diferente entrenamento. Esaki lo bay pone cu e Instituto ta cumpli mas ainda cu e exigencianan di e comision contra tortura y maltrato di detenidonan (CPT), cu un di nan exigencianan ta cu un detenido mester tin tanto recreo como educacion y formacion durante e periodo cu nan ta encarcela den e instituto aki.
E seccion di straf, cu algun tempo atras sufri daño di candela, cu ta den e proceso di renobacion ta bayendo den bon direccion. Na momento cu e renobacion aki keda completa den algun siman, lo por haci uzo di 16 cel adicional den e seccion aki.
Tambe e titular di husticia a tuma nota cu algun prizonero, bou guia di e contratista ta haciendo e trabounan di renobacion den e instituto aki.
Minister Dowers ta di opinion cu esaki ta un adelanto hopi grandi na momento cu e hobennan encarcela, ta siña un ofishi, lo por bandona e institucion aki cu e conocemento adkiri y por bay eherce esaki den sociedad.