Muchanan di awendia no ta focus pa studia mayoria muchanan ora cu bo papia cu nan, nan ta haya estudio ‘boring’ (laaf). Y esaki ta resalta den e resultadonan na final di aña escolar. Problemanan social – emocional di e hobennan tambe ta hunga un factor den e resultado di e final di aña escolar.
SKOA a haya resultadonan di examen di su MAVO- schoolnan, di e candidatonan cu a slaag. Un total di 425 studiante, di cual 306 a slaag den e prome rondo. Esaki ta un 72%. Sra. Josette Daal, directora di SKOA ta amplia.
SKOA ta satisfecho, pero semper nan ta boga pa haci esaki miho. Pero di 425 cu 306 a slaag, toch SKOA ta basta contento cu esey. Awendia tin diferente factor cu ta haci cu e atencion di e muchanan no t’ey mas. Muchanan di awendia no ta focus pa studia, riba cual Sra. Daal, directora di SKOA a bisa cu mayoria muchanan ora cu bo papia cu nan, nan ta haya estudio ‘boring’ (laaf).
Den scolnan di SKOA ta poniendo hopi enfasis ariba scolnan digital. Vooral den e scolnan di MAVO cu ta resorta bou di SKOA. Diferente scolnan tin diferente sistema di digitalisacion. Frere Bonifacius tin iPad pa mucha. St. Paulusschool y Sagrado Curason tin sistema di flatscreen. Nan tin nan mesun sistema di digitalisacion.
Awo lo sigui cu e MAVO schoolnan, cu mas sigur lo kies pa e flatscreen. Esaki ta haci e enseñansa mas atractivo pa e studiante. E por bin cu su laptop scol, ya cu awo tin wifi na scol. Nan por haci nan proyectonan na scol mes. nan por bay riba internet, download y haci’e mas interesante. Esey ta e pensamento cu scolnan catolico tin.
Entrante e aña escolar SKOA lo bay haci un sondeo bou di e hobennan, pa nan mes bisa kico, na unda y con nan lo desea pa haci nan estudio mas atractivo. Pero hopi biaha, e barera di idioma ta hunga un rol bou di nos hobennan. Pero loke ta un hunga un rol hopi grandi, y esey ta algo di e comunidad completo, ta e parti social-emocional di e hoben. Esey tambe ta hunga un rol.
E problemanan social ta hunga un rol hopi grandi bou di e hobennan y esaki por wak’e for di ora nan drenta kleuterschool, segun Sra. Daal.
SKOA lo reuni pa bin cu’n sistema di partnership, p.e. un partnership cu Directie Sociale Zaken. E pensamento di no trata solamente e mucha, pero tambe e mayor. Mester corda cu SKOA ta un instancia di educacion, nan ta educa den parti di materia. Pero nan ta aporta tambe na e parti social – emocional y nan mester trece esey den balanse. Esey ta e parti mas dificil ya cu e maestro ta bin pa duna les y e parti social- emocional cada biaha ta crece mas hopi, dus no tin un balans entre e dosnan ey. Esey ta cosnan cu SKOA ta bezig ta evalua: con pa bay sigui. Awendia e muchanan ta drenta scol cu nan pakete di preocupacion caba, y esey ta algo cu antes no tabata tin.
RELACION SCOL Y MAYORNAN
Gran parti di mayornan ta interesa, pero hopi biaha nan no sa e caminda pa cana y ariba esey tambe nan ta trahando ariba instancianan externo. E instancianan social, externo. E instancianan social, externo.
Comunidad di Aruba a haya un sla caba, y esey mester pone tur hende para keto y traha na bienestar di e pueblo aki.
Por ultimo, Sra. Josette Daal, directora di SKOA a bisa cu mayornan mester duna atencion na nan yiunan. E ta un situacion dificil, nan ta traha y hopi biaha e orarionan di trabao ta hopi largo. Trafico ta un hunga rol, cu pa ora cu nan yega cas atardi, ta basta laat y e yiunan tabata henter dia so na cas. Pero mester bisa, cu no ta mayor so, pero ta comunidad mester mira con ta bay tackle e problema aki. Duna guia, scucha otro, etc. Tin asina hopi factor cu por hunga un rol positivo ariba full e situacion aki. Aruba ta un pais relativamente chikito ariba e mundo aki, si tur uni y tur hende pone nan nanishi den mesun direccion, lo por yega na soluciona cierto problemanan. No ta algo solamente di maestronan, pero ta pueblo mester reeduca su mes. Nos a lubida kico ta respet, kico ta duna otro un man. Nos a lubida ariba cosnan chikito, pa cual ta kere cu meste enfoca ariba esey, mester siña nos muchanan esey, tene compasion pa otro.