Diamars mainta, pa 9 or y 05 di mainta, durante un patruya di rutina banda di Hyatt Regency Aruba, agentenan ta nota un auto cora para den e vak destina pa busnan di Arubus. Banda di e auto tabata tin un cabayero cu camisa manga largo y un maletin para, ta combersa cu e chauffeur di e auto en cuestion.
Na momento cu e cabayero aki a nota e patruya di polis, el a cuminsa bira nervioso, pa cual motibo a dicidi di bira bek y bay na e auto cora. Ora cu polisnan a yega bek eynan, ya e cabayero a bay caba. Door cu e orario y circumstancianan tabata mustra sospecho polisnan a dicidi di acerca e chauffeur di e auto aki. E chauffeur ta declara cu e cabayero ta un persona di habla Spaño y cu e no conoce. Segun e chauffeur e homber aki lo a puntr’e si e por a yud’e start su auto, ya cu esaki a daña. El a bisa polisnan cu e homber a cana bay zuid.
E agentenan a cuminsa cu un control banda di Hyatt Regency, pero e cabayero aki no tabata niun caminda. Despues di un rato, e cabayero aki a cana bin for di direccion di Hyatt Regency. Polisnan a puntr’e kico e tabata haciendo. El a declara na polisnan cu e tabata tin problema cu su auto y cu e tabata buscando yudansa. E no tabata compronde papiamento, y tabata papia solamente Spaño. Durante e combersacion e homber a cuminsa haci como sifuera e ta buscando algo den su maletin, y na varios ocasion polisnan a bis’e pa e saca su man for di e maletin. A puntr’e pa un ID y el a declara cu su ID a keda den e auto. Tampoco e por a duna un adres fiho na unda e ta bibando. Solamente cu e ta biba somewhere den Madiki y cu e tin 2 aña ilegal na Aruba. Polisnan a dicidi di bay cu e cabayero aki na unda su auto tabata para. Banda di Playa Linda, e cabayero a mustra e polisnan su auto, un Suzuki Ignis, color blauw, cu number A-26454. A puntr’e e ora ey pa su ID. E ora el a cambia e storia y a bisa cu e no tin niun ID cun’e y tampoco den auto. Esaki a lanta sospecho cerca autoridad cu e cabayero aki tabata kedando ilegal ariba nos isla. El a identifica su mes como
FE GOMEZ BOLANOS. No a keda autoridadnan nada otro pa tuma contacto cu Guarda Nos Costa. E cabayero aki, GOMEZ BOLANOS a wordo hiba pa Warda di Polis na Shaba y aki ela wordo entrega na personal di Guarda Nos Costa.
Polisnan a regresa na e auto y a haya un pida kabel di koper corta den auto. Esaki a wordo hiba Warda di Shaba. Security Guard di Playa Linda, K. lo manda e denunciante pa Strandpolitie si acaso bin resulta cu e pida kabel di koper aki ta horta. D
Den e auto a bin haya e polisa di seguro riba nomber di NJ BOLANO. A tuma contacto cu e persona aki kende a resulta di ta mama di GOMEZ BOLANO y e auto tabata pertence na dje. E mama a confirma cu su yiu homber enberdad no tin permiso legal pa keda na Aruba. A laga e auto na unda cu el a wordo haya y lo wordo busca despues door di BOLANO.