Durante un encuentro ameno diadomingo ultimo, representantenan di Aruba Tourism Authority conhuntamente cu varios socio envolvi den e plataforma di “Raad van Kinderen” incluyendo Aruba Investment Bank, Maestronan di scol, representantenan di Ministerio di Educacion, Global Shapers a reuni hunto cu SAR Prinses Laurentien kende a bishita nos isla pa varios encuentro. E prinses a presenta un idea nobo na esnan presente: “Kids Moving the World”.
SAR Prinses Laurentien a introduci “Raad van Kinderen” bou di e fundacion ‘Missing Chapter Foundation’ (MCF) cu e la funda na aña 2010 . Esaki a wordo funda cu e meta pa trece opinion di muchanan mas serca di organisacionnan cu tin un impacto grandi den nos comunidad, y di es manera aki garantisando un futuro mas sostenibel cu participacion di nos muchanan. Na Aruba varios organisacion ta forma parti di “Raad van Kinderen”, incluyendo A.T.A. Esaki ta unda e muchanan mes ta yuda pensa structuralmente hunto cu organisacionnan riba diferente temanan y duna posibel solucion riba dilemanan cu organisacionnan ta enfrenta y ta presenta na nan.
Un di SAR Prinses Laurentien su deseonan pa medio di “Kids Moving the World” ta pa “empower” nos muchanan. Asina a bin na e idea di un fondo cu ta laganan ta envolvi den escogo e proyectonan cu nan ta haña tin balor agrega pa nos miedo ambiente, comunidad of industria turistico. E fondo aki ta permita nan carga responsabilidadnan, mas aleu di locual e plataforma di “Raad van Kinderen” ta brindanan. Asina laganan bos resona mas y confia cu nan ta “change makers” cu nos mester. Ta e intencion pa lansa “Kids Moving the World” na Aruba y despues introduci esaki na otro paisnan. Claro cu lo sigura cu e guia y training t’ey pa nos muchanan pa asina nan por carga nan responsabilidad debidamente.
A papia di diferente otro idea unda y di ki manera por envolvi muchanan den diferente trayectonan. A.T.A. mes a duna un presentacion cu diferente proyecto dirigi riba nos muchanan, ambos e mucha cu ta bishita y esun cu ta biba aki. E “Very Important Kid Program” ta un ehempel di con A.T.A. ta atrae muchanan y ta sigura cu ta entusiasma nan pa bishita diferente sitio cu A.T.A. kier pa nan y nan mayornan conoce. Esaki ta haci pa medio di un “Very Important Kid Passport” por ehempel, unda mester mustra cu nan a bishita tur e sitionan. A papia riba e “Aruba Certification Junior Program” dirigi riba muchanan, pa asina amplia nan conocemento di Aruba y Turismo pa medio di entre otro un tour cu e muchanan. Turismo como curiculo na scolnan ta algo cu tur a subraya como importante, y algo pa cual A.T.A. ta den contacto cu esnan concerni. A elabora riba introduccion di un guia pa muchanan cu ta bishita Aruba, traha dor di muchanan di Aruba, asina ki nan ta conta e storia di nos isla. A.T.A. a introduci e buki Benchi cu Lina aña pasa, cual ta dirigi riba nos muchanan di scol y riba amplia nan conocemento di nos turismo.
A.T.A. ta orguyoso di por forma parti di un iniciativa manera esun di “Raad van Kinderen” y pronto “Kids Moving the World” cu ta mustra di por tin un impacto positivo riba nos comunidad, y nos muchanan. Ademas A.T.A.ta gradici pa e bishita y di por a forma parti di e discusion diadomingo ultimo hunto cu diferente socio presente.