Diaranson un biaha mas lider di partido MEP tabata di bishita cerca informador mr. Arie Swaen. Esaki en conexion cu e proceso di formacion di gobierno, cu un base amplio. Segun Sra. mr. Evelyn Wever- Croes, e sorpresa mas grandi haya cerca informador diaranson mainta tabata e tema di financia di pais Aruba cu ta mustra algo hopi serio unda Aruba ta awe dor di e debe cu AVP ta lagando atras.
Nan a haya mas informacion diaranson, cual tabata un pakete di informacion cu diferente documento cu a wordo entrega na informador. Ta trata di documentonan financiero, documentonan di fondonan di pensioen como tambe ta e carta di Direktie Financien, cu ta un carta cortico, pero cu ta mustra e realidad cu Aruba ta biba aden.
Pa loke ta e presupuesto di 2018 cu mester ta den Parlamento caba, y segun CAFT lo mester tin un surplus di 0,5% ekivalente na 25 miyon florin. Direktie Financien ta bisa cu e documento cu nan tin ta duna un deficit di 195 miyon florin. Tin un buraco financiero di casi 200 miyon florin. Esaki ta mustra e retonan nan dilanti. E reto no ta solamente partidonan cu no tabata traha cu otro, lo mester traha cu otro, e reto no ta solamente defini kico ta e prioridadnan, ya cu cada partido a bay eleccion cu un programa. Aworaki cada partido lo mester bay wak kico si por y kico no por ehecuta.
Awo mester enfrenta e realidad. E ta un realidad financiero hopi mas serio cu por a pensa cu e ta. Segun Sra. mr. Evelyne Wever, tur hende tabata sa cu e presupuesto no ta entrega, e tabata sa den ley cu gabinete Eman mes a bin cun’e, cu 25 miyon mes ta dificil pa yega. Pero nunca por a pensa cu e buraco financiero ta 200 miyon. Esaki ta cambia e scenario, pero no ta cambia e disponibilidad. Esey el a expresa na informador. Sabiendo esaki, cu ta conta cu tur departamento pa traha ariba esaki, ta dispuesto pa sigui cu e siguiente fase. Diaranson informador lo finalisa e combersacionnan y pa asina firma un convenio, pa despues entrega su informe na gobernador.
Partido AVP ta liber pa expresa su mes y aki ta e respet pa e decision di pueblo ta loke ta mustrando. Cu e no ta mes stabiel manera cu’n solo partido. Un coalicion lo trece mas ‘checks and balances’. Ta hopi importante pa expresa cu cualkier convenio cu yega cu partidonan, ta basa ariba e echonan cu kier un gobierno stabiel y firme, duradero cu por bay sinta e proximo 4 añanan.
Cu e situacion financiero ta malo, esey tur hende tabata sa. Pero si loke a bin di sorpresa tabata e suma di e deficit. Aworaki tin un buraco financiero di 200 miyon. Un otro punto ta cu e presupuesto 2018 no ta cla y aproba prome cu 15 di December 2015. Ta circunstancianan cu ta dificulta e comienso di un gobierno di coalicion.
Tabata tin combersacionnan orientativo cu lider di POR y a keda palabra cu despues di e reunion di diaranson, lo hiba e combersacionnan mas avansa riba e acuerdonan cu lo mester yega na dje.
E director di Financia mes a trece e documento pa informador. Inicialmente e director di Financia a bisa cu e situacion financiero no ta alarmante. Pero si e situacion ta serio, biniendo specialmente di e departamento cu mester a prepara e presupuesto cu e mester a keda cla cun’e. Awo ta hay’e ariba papel y ta keda na e proximo gobierno pa traha cun’e. Kisas e director no tabata kier a bati alarma, pero ta comprendibel.
Por bisa cu Directie Financien ta solamente duna un bista general di kico ta ariba mesa aworaki y kico ta importante pa e gobierno nobo tene cuenta cun’e. Aworaki mester haci un quick scan, pa bay mas den extenso, door di un comision mixto, forma door di expertonan local y di Hulanda. Ta pensando ariba un investigacion asina, cu mester wordo haci den e prome siman di gobernacion pa saca un quick scan di con e situacion ta realmente.
E problema por wordo soluciona sin tuma medida. Manera a bisa den campaña MEP ta kere na baha gasto pa spaar 50 pa 70 miyon pa aña. Nan a kere cu tabata tin mas tempo pa negocia cu Hulanda, pa baha gastonan di interes cu ta 200 miyon.
Ta wardando e fase di informacion pasa pa cuminsa cu e fase di formacion. E persona nombra Formador, tin autoridad pa negocia cu Hulanda, segun Sra. mr. Evelyn Wever- Croes.