E siman aki Sindicato STA lo bay busca su miembronan pa wak si ta haya e sosten pa bay manifesta dia 29 di September. Segun presidente di e sindicato, Diego de Cuba aunke cu e tempo ta cortico, toch lo purba di reuni cu e miembro y delegadonan diamars y diaranson, pa determina si berdaderamente si nan ta bay di acuerdo pa sostene e marcha aki of ta bay manifesta directamente unda e lo termina, pa nan ta presente eynan tambe. Hecho ta keda cu semper ta papia cu achterbaan prome, pa tuma e decision final si ta bay participa si of no. Hecho ta keda si, cu criminalidad na Aruba, ta algo hopi alarmante, pero e tin su raisnan y Gobierno mester lanta for di soño. Si tin placa pa hinca tur caminda, si tin 45 pa 46 miyon pa hinca den coordinadornan di Gobierno, mester por tin 20 miyon pa por hinca den siguridad nacional di e pais aki. Tin cu wak bon riba locual ta e raisnan di e problematica di criminalidad ta entre otro hendenan cu falta di educacion, dropouts di scol, esey tambe ta haya salarionan hopi abao cual ta causa cu locual cu ta trece cune ta problemanan social, placa no ta yega den cas, hende cu problema manera debe y asina aki atraconan ta cuminsa y tambe ta trece cune caminda cu tin un area pafo na nos costa, cu ta completamente habri, unda cu ta masha hopi ilegal ta drenta e pais aki. Nan ta aki riba y nan tambe por haci nan baina. Aparte di esey tin cu bisa cu toch mester bin un cambio den e maneho di e Gobierno pa siguridad nacional di e pais aki. Tin cu corda, si mira ultimamente cuanto atraco, cuanto hortamento tabata tin riba turistanan canto di beach y tur caminda riba e isla, ta bisa cu e cosnan aki ta sumamente di lamenta. No ta manera antes mas cu noticianan aki no ta yega. Awor aki ta un konopi nan ta primi y el a bay henter mundo rond. Esaki ta locual cu de Cuba ta kere cu Gobierno actual, den su totalidad tin di realisa. Lamentablemente esun cu ta sinta riba e stoel, minister Dowers, ta sinta riba e batata cayente. E lo tin cu bay busca un solucion pa e problema aki y lo e tin cu bay pone pia abao pa su propio Gobierno pa yega na un solucion rapido pa locual ta trata e situacion di criminalidad aki na Aruba, cu ta espantoso. Por mira ultimo tempo dos caso di asesinato. Danki na Dios un di nan ta mirando luz di dia. Pero tin tur e casonan si bay repasa nan, tur caso di ladronicia, atraco, cu ta tuma luga tur dia, hortamento di auto, drentamento di cas di hende. Awor aki ta dal un stuntgun, manda for di tino y horta placa. E situacion a bay completamente for di man, segun Diego de Cuba.