Presidente di Parlamento, drs. Mervin Wyatt-Ras ta trece padilanti cu e siman aki na Willemstad-Corsou lo inicia reunionnan entre parlamentonan di Aruba, Corsou,St. Maarten y Hulanda. Dialuna tin reunion entre e paisnan Caribense den Reino y di Dialuna pa diabierna lo tin e reunion di IPKO, esta e Interparlementair Koninkrijksoverleg.
Topiconan importante lo ser trata manera e asina yama geschillenregeling, esta e areglo ora di disputa, cu ta di importancia cu ora tin diferencia di opinion den Reino un entidad independiente y neutral lo por intermedia pa asina sali dor di disputa. Aruba y e otro islanan conhuntamente a trata ariba un concepto di ley, sinembargo Hulanda tambe tin un concepto y ta keda nos paisnan cu ora dicho ley ser trata den parlamento Huandes nos paisnan lo por bin cu cambionan pa medio di entre otro amienda(nan). E topico di salubridad tambe lo ser trata. Ya caba a ser haci un sondeo profundo di salubridad di nos paisnan y mester yega na ehecuta cierto palabracionnan haci entre e paisnan despues di e Healthcare Conference cu a ser organisa dor di e minister di Aruba. Parlamentarionan di e islanan lo haya un recorido den e hospital nobo den construccion. E asunto di nos Hubentud, enseñanza, situacion na Venezuela, strafnan minimo y conexion entre islanan lo ser trata dialuna entre e paisnan Caribense. Igualmente cooperacion economico, leynan di consenso y procedura di nombracion di gobernadornan.
Topiconan di IPKO lo ta casi igual cu ta e geschillenregeling, oportunidadnan economico den Reino, cambio di clima y energia, Reino ideal den 2040, hubentud, nos studiantenan, integridad den gobernacion, Hof constitucional, etc. E biaha aki e deliberacionnan lo tin un caracter menos forma en bista cu tin hopi cambio den e constelacion di e diferente parlamentonan den Reino. Sin embargo e lo duna oportunidad pa trata e topiconan mas profundo. Wyatt-Ras ta spera cu por tin bon resultadonan y cu nos paisnan lo por yega mas cerca di otro pa loke ta trata e diferente issuenan cu ta concerni nos tur.