Durante un reunion cu a cuminsa desde 10:30 di mainta cu a dura te 4’or di atardi, e presupuesto di Parlamento a keda aproba cu 13 voto na fabor y 4 en contra y tambe e presupuesto di Contraloria General cu a ser aproba unanimamente.
Presidente di Parlamento Wyatt-Ras, lider di fraccion di PDR, sr. Andin Bikker, parlamentario independiente, sra. Marisol Lopez Tromp y sr. Marlon Sneek, vice-fractieleider di fraccion di AVP a defende e ley. Lider di fraccion di MEP, sra. Evelyn Wever Croes, kende tambe a firma e presupuesto a scoge pa bula afo y haci politikeria. Sr. Rene Herde a guia e reunion como vice-Presidente di Parlamento. Sorpresivamente sin argumento di contenido, sino emociona, sra. Wever-Croes te hasta a vota contra di e presupuesto cu e mes a traha.
Sra. Wever-Croes no por a contene e rabia y odio y a baha pisa riba presidente di Parlamento acusand’e di diferente asunto cu a sosode prome cu e presidente a asumi su encargo. No a keda nada otro di bis’e pa busca un terapista pa yud’e cu su odio.
E presupuesto ta regarda un suma di afls. 12.799.400,- cu un suma di afls. 375.000 pa inversionnan. E maneho di Parlamento den temponan venidero lo ta dirigi riba leynan cu lo fortifica funcionamento di e organo di mas halto manera Independisacion di Parlamento, e ley di ombudsman y ombudsman pa mucha y renovacion di reglement van orde. Den Reino Parlamento di Aruba tin menos trahado cu tur otro pais y pues e sosten pa medio di profesionalismonan ta necesario pa asina sostene parlamentarionan. E sistema digital tambe lo haya atencion locual ta trece gastonan cun’e. Mester describi tareanan di personal pa asina hisa e calidad di trabou. Esaki ta un proceso cu a inicia hopi aña caba pero cu no a continua. Pa loke ta e sistema di airco esaki lo mester ser innova locual lo costa Parlamento. Siguridad tambe lo mester haya atencion. Despues di incidentenan den Parlamento a dicidi di eleva e sistema di siguridad. Tin polis den e edificio y lo mester tene bista riba publico pa asina garantisa siguridad pa e personal. Ademas lo keda fortifica relacion den Reino pa medio di reunionnan di IPKO y tambe fortifica relacionnan den Latino America cu participacion den Parlatino. Wyatt-Ras ta considera cu no e, sino Parlamento tin un reto grandi pa e aña venidero y cu mester di Parlamentarionan cu ta durf tuma responsabilidad pa nan actonan. Ta lamentabel y hasta infantil con lider di MEP a dicidi sin argumento ‘inhoudelijk’ di vota contra di e presupuesto. Ora di keha cu airco no ta traha, cu e no ta haya su documento na tempo, cu su fractiemedewerker mester wordo paga, cu tin cu mehora un ke otro den Parlamento e lo ta “haantje de voorste” pa haci esaki, sin embargo ora di vota pa e suma cu ta haci tur trabou posibel, e ta vota contra sin argumento convincente. Si pueblo di Aruba mester depende di e señora aki pa pone un suma pa por yuda e sigur lo coopera pero si semper ta scoge pa para na banda y critica. Tabata hopi lamentabel pa e otro miembronan di CHA y e personal cu a traha duro ariba e presupuesto pa tende con e señora aki no por a sostene loke e mes tambe a pone pa haci pa e aña venidero.
Aki ta cla cu e lider di fraccion ta ciega pa rabia riba Wyatt-Ras y ni pa prepara su mes bon pa e por realisa su mes cu e ta acusa Wyatt-Ras riba asuntona prome cu Wyatt-Ras su tempo. Hecho ta cu Wyatt-Ras ta nombra dia 13 di September y tin menos cu un luna na trabou.