THE BOTTOM – Durante un bishita di Colegio di supervision financiero di Boneiro, Sint Eustatius y Saba (Cft) a conclui cu Saba te ainda tin su finansa publico bon na ordo. Aunke ehecucion di e presupuesto 2016 no a bay completamente segun plan, Saba a logra mantene e presupuesto balansa. A elabora e contratiemponan financiero durante 2016 na un forma adecuado den e presupuesto, loke tambe ta ilustrativo pa e maneho financiero corecto. Esaki ta sali na cla tambe for di e declaracion aprobatorio di accountant pa e di dos aña consecutivo. “Saba a mustra atrobe di tin su asuntonan bon na ordo” segun Presidente di Cft Age Bakker.
A cera aña 2015 cu un resultado positivo, cu ta suficientemente halto pa por cumpli cu e amortisacionnan. Esaki ta sali na cla for di e cuenta anual di 2015, na cual e accountant a otorga un declaracion aprobatorio pa e di dos aña consecutivo. E reportahe di ehecucion di e di tres kwartaal 2016 ta duna como resultado un saldo positivo, pero e saldo aki no ta alcansa pa na fin di 2016 por cumpli cu e obligacionnan di amortisacion di e entidad publico. Particularmente como consecuencia di un Contrato Colectivo di Trabou nobo y diferente contratiempo mas e gastonan durante 2016 a resulta mas halto cu loke a presupuesta na prome instancia. Pa motibo di esey e saldo positivo cu segun expectativa ta resta pa fin di aña no ta alcansa pa por cumpli cu e obligacionnan di amortisacion presupuesta. Como consecuencia di esey e expectativa ta cu Saba lo mester bay hinca man den su posicion di likidez.
Durante e bishita di Cft dia 14 di December a hiba combersacion cu Colegio Ehecutivo y Conseho Insular tocante e situacion financiero di e entidad publico y e contratiemponan financiero durante 2016. Cft a indica cu a haya un solucion inteligente cu bahamento di e amortisacionnan anual. Esaki ta nifica si cu e periodo den cual ta bay efectua e amortisacionnan ta bira mas largo. E espacio presupuestario cu ta surgi door di esaki na 2017 y 2018 ta necesario pa cubri e gastonan creciente di personal y mantencion. E gastonan adicional den 2016 tin como consecuencia un disminucion di e likidez. Cft ta comparti e preocupacion di Saba cu e presupuesto ta mucho smal pa por absorba structuralmente e contratiemponan ey.
Na final di e bishita tambe a para keto un rato na e maneho financiero. Pa e di dos aña consecutivo a otorga un declaracion aprobatorio di accountant na e cuenta anual. Cft ta conclui, pues, cu e maneho financiero ta di un nivel suficientemente halto y cu Saba mester mantene e nivel ey. Un punto di atencion ta e echo cu tin biaha ta entrega e reportahenan obligatorio na Cft cu cierto retraso.