Presidente di Cft Age Bakker: “A logra hopi, awor mester hiba e maneho financiero ‘up to standard’ ainda”

0
berber

Willemstad Curacao – Durante su bishita na Corsou Colegio di supervision financiero di Corsou y Sint Maarten (Cft) a indica cu den e resto di simannan mester traha riba realisacion di e entradanan no proveniente di impuesto pa mantene e presupuesto di 2016 ekilibra. E ehecucion ta canando den liñanan grandi segun e pronosticonan, pero e ta fuertemente dependiente di e ingresonan cu drenta den e di cuater kwartaal. Si logra realisa e pronostico, anto pa varios aña caba Corsou a cumpli cu e norma di un cuenta coriente ekilibra. Esey ta un señal cu finansa publico di Corsou ta di un caracter sostenibel. E reto principal ta pa mantene e fondonan social ekilibra y pa haya e maneho financiero ‘up to standard’. Cft ta pidi atencion tambe pa aproba rapidamente e cuentanan anual di 2012 te cu 2015.

Ehecucion di e presupuesto di 2016
For di e reportahe di ehecucion te cu e di tres kwartaal ta sali na cla cu Corsou ta spera di cera e aña cu un saldo positivo, teniendo na cuenta algun entrada incidental cu lo mester realisa ainda den e di cuater kwartaal. Cft ta di opinion cu, a base di e realisacionnan te cu september, Corsou lo mester hiba un maneho hopi fuerte pa por logra haya e entradanan aki ainda y cera aña 2016 na un forma ekilibra. Banda di esey Cft ta observa cu den e ultimo lunanan di e aña di ehecucion ta keda menos espacio pa por absorba cualke contratiempo eventual. Cft ta bay monitorea realisacion di e entradanan aki cu masha atencion.

E fondonan social hunto a acumula durante e prome tres kwartaalnan un deficit di ANG 22 miyon. E deficit di AOV/AWW a sigui aumenta. Ta compensa esaki parcialmente cu e resultadonan positivo di e fondo di BVZ. E deficit conhunto ta bay pa cuenta di e fondo fluctuante mas amplio. Cu esey e saldo di e fondo fluctuante ta bay atras di acuerdo cu e pronostico. Reduccion di e deficit den e fondo di AOV ta sigui ta un prioridad importante pa Corsou, a fin di mantene tambe e fondonan social permanentemente ekilibra.

Maneho financiero
Mehora e maneho financiero pa yega na standardnan internacional ta keda un reto importante. Den tal caso otorgamento di un declaracion aprobatorio tocante e presupuesto di 2018 di parti di e accountant lo por ta un ambicion alcansabel. Pa tal efecto lo mester fortifica e funcionnan financiero di e ministerionan, cu un rol coordinativo pa Ministerio di Finansa. Un parti importante di maneho financiero ta conclusion na tempo di hustificacion di e presupuesto. E cuentanan anual di 2012 y 2013 ta poni riba agenda di Parlamento. Conseho di Ministro a entrega e cuenta anual di 2014 na tempo, pero control door di Controlaria General di Corsou (ARC) no a termina ainda. Tambe a entrega e cuenta anual di 2015 na tempo, pero SOAB y Controlaria General mester control’e ainda. Cft ta urgi pa aproba e cuentanan anual di e ultimo añanan y entrega, controla y aproba e cuentanan anual futuro mas lihe, pa Parlamento, como parti di e derecho presupuestario, haya informacion na tempo tocante agotamento y realisacionnan real di e presupuesto.

Preparacion di e presupuesto di 2017
Den su conseho tocante e proyecto di presupuesto di 2017 Cft a pone enfasis riba un argumentacion mas detaya di e sostenibilidad financiero di e fondonan social. Tratamento di e proyecto di presupuesto den Comision Central di Parlamento entretanto ta finalisa. Tratamento publico di e proyecto di presupuesto den Parlamento ta planea for di dia 15 di december. Despues di aprobacion di e presupuesto Cft lo elabora su conseho definitivo.

Durante un bishita di dos dia na Corsou teni dia 6 y 7 di december Cft a papia cu Conseho di Ministro demisionario, Ministro di Finansa demisionario y den forma informal cu Parlamento.