Stichting Monumentenfonds ta consciente di e situacion pa loke ta e forno y tanki di awa den Rancho y cu e monumentonan aki mester di atencion.
Directora di Stichting Monumentenfonds, Anne Witsenburg, ta splica cu e Stichting ta dedica na preserva monumentonan y ta rekeri di fondonan pa logra esaki. Nan no tin subsidio di Gobierno. Nan ta verhuur mayoria di nan edificionan y asina haya e fondo necesario pa por inverti den e trabounan di mantencion. E situacion ta diferente pa e forno y tanki di awa, pasobra ora nan inverti placa pa mantencion, nan no por verhuur esakinan pa cubri e gastonan.
Den e ultimo añanan, e Stichting ta trahando hunto cu Sticthing Rancho pa wak ki solucion nan por trece pa e situacion actual di e monumentonan aki. Pa hopi aña caba, Stichting Monumentenfonds ta paga un instancia pa haci e sitio limpi cada dos siman, pero segun sra. Witsenburg, esaki no ta yuda hopi n’e momentonan aki. E directora ta splica cu nan ta trahando pa busca fondo pa restauracion di e forno, pero tambe nan ta mirando con nan por mantene e area rond di e forno continuamente. Si nan laga e situacion rond di e forno manera e ta, e lo crea un problema hopi grandi.
Stichting Monumentenfonds kier traha hunto cu Gobierno pa wak kico nan por yuda cune pa mehora e area aki, pasobra Rancho ta e origen di Oranjestad y nan kier preserva e historia di Rancho. E bario tin su historia y ta yen di monumentonan, cual ta haci’e bunita. E directora ta mustra cu si bin un cooperacion entre e instancianan, nan por logra pa restaura y mantene e monumentonan aki p’asina por sigui conta nan historia.
En cuanto cierto vandalismo cu sa sosode cu e monumentonan aki, sra. Witsenburg ta splica cu anteriormente nan a yega di pone heki pa evita cu hende por yega cerca di e forno, pero esaki a wordo kibra hopi facil. E situacion social rond di henter e areanan rond di e monumentonan aki mester mehora p’asina resolve e problema. Ta mirando si e proyecto ta inclui un cura, pero pa tambe mantene un entrada pa esnan cu bishita por mira e forno di paden.