A bira un tradicion caba cu aña tras di aña Radio Galactica 99.9 FM, awendia conoci como G-FM 99.9, ta presenta un marathon di Oldies den e ultimo siman di October.
E aña aki Oldies Marathon ta celebrando su di 25 aniversario y pa cu esaki lo tin un programacion special.
Joe Hernandez ta presenta un aña mas, pa di 25 aña consecutivo, Marathon di Oldies. Algo particular y cu mester resalta ta cu Joe mes a cuminsa na radio un 25 di October na aña 1982 na Radio Carina e tempo ey. Casualmente Joe Hernandez a cuminsa presenta e Marathon di Oldies riba un 25 di October na aña 1991 na Radio Galactica.
Manera ta custumber caba, coleganan di radio lo join Joe Hernandez den su marathon. A ahusta e programacion di G-FM den e siman di 23 pa 30 di October pa asina duna espacio na e marathon aki cu lo presenta musica di añanan ‘50 te cu ‘90.
E marathon lo cuminsa diadomingo awor, 23 di October, pa 5 pm y ta caba diadomingo dia 30 di Oktober pa 8’or di anochi. Den e siman aki lo tin programacion consecutivo presenta pa e diferente locutor di G-FM 99.9.
Bo ta cordialmente invita pa join Joe Hernandez y su coleganan den e Marathon di Oldies cu lo hibabo den un biahe bek den tempo.