Santa Rosa y Centro di Pesca Hadicurari invitando piscado y pueblo en general
Nacionnan uni (U.N.) su Food and Agriculure organisation (FAO) a decreta dia 29 di juni, dia di san pedro, como Fishermen’s Day, esta dia di tur piscado. Den henter e region di Caribe rond di e dia aki piscadonan ta celebra y refleha riba e ofishi noble aki, unda hende a sa di sali bataya contra elementonan pa trece cuminda tera. Sin duda cu lama ta forma un di e fuentenan mas grandi di proteina pa e ser humano desde principio di tempo.
Kico tur tin:
E aña aki atrobe, e Departamento di Agricultura, Cria y Pesca di Aruba, conoci como Santa Rosa, conhuntamente pa mas di 24 aña consecutivo caba, ta organisando un tremendo celebracion cu torneo di pesca, dia di famia, festival di cuminda di lama y un fiesta bailabel pa asina rendi homenahe na nos piscadonan di Aruba. Preparacion ta andando pa canto di lama aya na Palm Beach dilanti di e pier di centro di pesca Hadicurari, bira e lugar ideal pa duna realse na e fiesta di solidaridad cu piscadonan di henter Aruba.
Pa e piscadonan:
Lo bay tin un torneo di pesca cu mas di 5000 florin reparti na premio pa 2 categoria y varios mayor ehemplar. Mas cu claro tur participante por conta cu e estimulo di ricibi e biaha aki un pakete di seguridad. E enfoke di Hadicurari pa sigui aumenta e responsabilidad di cada piscado pa tene seguridad riba lama ta data desde di su inicio como centro di pesca. E biaha aki atrobe por spera e camisetanan manga largo special contra solo y e biaha aki cu reflerctornan pa mas seguridad anochi. Mas informacion lo ta obtenibel durante di e reunion di capitan cu lo tuma lugar diasabra 30 di juni na Nos Clubhuis di Hadicurari for di 8’or di anochi.
Pa famia y publico:
Durante di e celebracion mientras piscadonan ta pisca, na tera lo tin un dia di famia canto di lama cu un festival di cuminda lama, musica festivo pa anima y mas cu claro bendemento di pisca fresco asina cu e piscadonan caba di pisa pa e torneo. Pesey mes bin tempran unda desde 11’or di mainta e ambiente ta ranca sali na Hadicurari cu musica di DJ ora pa bailadores y lo termina te ora solo baha cu musica di e banda di momento Jeo 297.
Reserva e fecha:
Di awo caba e comision organisado, consistiendo di Santa Rosa, Hadicurari y piscadonan, ta pidi pa reserva e fecha di diadomingo 1 di juli pa bin celebra cu piscadonan di Aruba. Grandi y chikito lo sa di haña algo pa disfruta di e celebracion di, pa y cu piscadonan di Aruba.