IMG_1587
Diamars atardi na La Bodega a tuma lugar entrega di e prome Heineken Road March
Champion. E premio popularmente conoci den pueblo como “the people’s choice”
of “road jam” a bira oficial e aña aki momento cu riba iniciativa di Stichting Musica
a dicidi di partner cu Romar Trading y Heineken pa asina galardona e cancion local
di mas popular di e temporada di carnaval. Tur e cancionnan cu a participa den e
grandioso Aruba Caiso & Soca Monarch 2013 a bini na remarke pa e premio aki.
Despues di un sondeo entre e radio emisoranan, combina cu un sistema di voto popular
por medio di SMS di Setar NV, y un cuerpo di jurado, a yega na e conclusion unanime
cu e ganador maximo di e Heineken Road March Champion 2013 a resulta e cancion
Pan Di Dios componi pa Claudius Philips y interpreta pa Jairo Evertz bou di e nomber
artistico Buchi Cunucu. Den un ambiente hopi ameno na La Bodega ehecutivonan di
Romar Trading y Stichting Musica a hasi entrega di e gran premio di Afl. 10.000,00
na e ganador maximo di e prome Heineken Road March Champion, e compositor y
creador di e cancion di mas popular di carnaval 2013 Pan Di Dios esta Claudius Philips.
Di e manera aki Stichting Musica kier incentiva compositornan local pa continua cu
nan bunita labor di trece mas y mihor composicionan pa Aruba por disfruta di dje. No
warda mas pa otro aña pa bo haya bo inspiracion, compone e aña aki mes pa bo ta bon
prepara ora cu e aña bolter. Nos palabra di felicitacion ta bay na e ganador di e premio
aki como tambe na Romar Trading, Heineken, Stichting Musica, tur radio emisora y tur
fanatico cu a manda sms pa e bunita iniciativa aki.