Desde e inicio di e evento na 2003, Ministerio di Deporte hunto cu su partnernan ta reconoce Aruba su Atleta di Aña den e asina yama Premio Excelencia den Deporte. Un evento di gala cu un toke diferente cu nos ta custuma cune y cu e aña aki lo celebra su di 15 aña di existencia. Durante di un anochi di gala lo haci entrega di e maximo reconocimento na e diferente atletanan cu a destaca den e aña deportivo anterior. E evento di Premio Excelencia den Deporte ta e unico evento deportivo unda nos miho atleta, dirigente y oficialnan nomina ta bini hunto pa asina wordo reconoci pa e tremendo trabou desplega, den e caso specifico aki, den aña 2017.
Dialuna 5 di maart ultimo e invitacionnan a sali pa tur federacion deportivo pa manda nomber di nan nominadonan no mas tarda cu e fecha diabierna 16 di maart 2018 na oficina di Stichting Sportsubsidie Aruba na Entertainment Center durante orario di oficina. Comision ta spera di por haya un reaccion positivo di tur federacion sigur mirando cu e aña aki lo celebra e di 15 aniversario di e magno evento aki.
E Premio Excelencia den Deporte 2017 ta priminti di bira uno yena di sorpresa, unda e comision encarga cu e trabou di supervision lo tin e tarea dificil pa scoge e diferente nominadonan como tambe e miho atleta di Aruba. Aña pasa, e atleta di Beach Tennis, Aksel Samardzic a bira e ganador maximo di e galardon Premio Excelencia den Deporte. Ken e lo keda corona como Aruba su Atleta di Aña 2017?
Mas informacion lo sigui den e siguiente comunicadonan di prensa unda lo divulga mas di e evento Premio Excelencia Deportivo 2017.