Aruba Softball Bond ta trahando duro pa cumpli cu su vision entre otro pa prepara un seleccion femenino riba halto nivel pa defende bandera di Aruba. Esaki lo ta e promer campeonato oficial di CONSURSA den historia di softball y ASB ta sumamente contento pa por tin un campeonato di e magnitud aki. Estefano Croes kende desde December 2017 a wordo eligi den bestuur di ASB y por cierto a bira e Director Tecnico di Aruba Softball Bond tin e tarea duro pa percura cu Aruba tin un seleccion bon prepara. Pa por logra e meta aki a adkiri un entrenador internacional den nomber di Luis Pire hunto cu entrenadornan local Rayborn Didder y Lucio Geerman kendenan ta forma e Team pa prepara e seleccion. Mester accentua cu entrenamento a inicia desde luna di Juni unda e pre seleccion ta practica 4 bes pa siman. Tur dialuna y diahuebs di 730 pa 10pm na veld di Flatsone. Tur diamars 630 pa 830pm na veldnan na Pos Chiquito y tur diasabra mainta 830am na veld di Rockets. Aruba Softball Bond alabes ta den e fase final pa forma e comision cu lo carga e proyecto aki cumpliendo asina cu tur rekisito y exigencianan internacional. ASB ta contento con entrenamentonan ta bayendo y lo keda monitor esaki di cerca pa brinda e ayudo unda ta necesario. Banda di esaki entrenador Luis Pire ta bezig cu seleccion masculino tambe kendenan probablemente lo biaha pa Panama 3 pa 8 di October pa un competencia Centro Americano y cel Caribe. Enfoke ta pa hisa nos nivel competitivo tin tur confiansa cu lo logra esaki. Softball den pleno desaroyo.