Partido POR a presenta durante su conferencia di prensa semanal, un candidato nobo, den persona di Eromil Bakmeyer. Esaki tabata un proceso largo pa el a tuma decision pa por uni na Partido POR. El a splica algun biaha tur e puntonan cu e tabata lucha cu nan, prome cu el a tuma e decision di drenta den politica. Esaki ta pasobra ultimo tempo a mira con politica ta bayendo na Aruba y no kier a forma parti di e strategia of e manera cu politica ta wordo hiba ultimo tempo. Segun Bakmeyer, e ta kere den un politica nobo. Tin cu hiba un politica unda cu nan ta mas integro, mas habri cu otro. Unda tin e espacio pa por dialoga cu otro, pero a base di respet. Tur cos mester bay a base di respet. Si e bay para pa derechonan di mucha, nos mester siña e muchanan kico ta respet mutuo, un pa otro. Si nos no por siña nos muchanan respeta otro, e ora nos no por para nos mes como adulto, ta e ehempel pa e muchanan aki. Nos mester ta e ehempel pa e muchanan, nos mester guianan. Bakmeyer ta tata di famia di 3 yiu, cual e ta para pa nan 100%. Pero tambe e ta para pa e famianan eyfo. E ta considera su mes como un Arubiano, e ta considera su mes di e pueblo aki. For di chikito el a scoge pa sirbi un Aruba cu ta digno di prosperidad.
Bakmeyer a haya e oportunidad cu el a gara pa por sirbi su pais na un nivel un tiki mas halto, pero e kier hiba un politica sano. Un politica habri, un politica cu por respeta un y otro eyfo.
El a splica cu e no ta un persona cu ta descrimina, ni den color, ni den rasa, ni den preferencia politico. E tey pa tur yega hunto den un Aruba cu por yega hopi mas leu. Nos por ta chikito den tamaño, pero sigur cu potencialnan grandi, pero cu por destaca afo. Nos muchanan por yega eyfo y yega na nivelnan halto, mundialmente. Bakmeyer no ta kere cu mester sinta y discuti di cosnan chikito y kibra otro. Mas bien cu hunto por sostene otro y crece hunto. Pesey Bakmeyer ey den POR. E tampoco no ta kere cu nos pais mester sigui cay den e gara di epidemia di diabetes. Nos tur stima nos famia y nos tur tin famia cu ta sufri di e malesa aki, cu ta sufriendo di e malesa aki of cu a perde un of mas famia di nos, door di e malesa aki of su complicacion di presion halto, atake di curason of un ke otro cu e malesa ta trece cun’e. Ta un malesa cu por preveni y traha riba dje. Esey ta un di e parti di prevencion ta cay aden. Si no tackle esaki awor aki, mañan, tanto nos costo di AZV, tanto nos problemanan social, tur esakinan ta bay crece bira mas grandi y ta bay tin un desaroyo economico fantastico, pero nos desaroyo social mes ta keda atras.
E ta kere, cu esakinan ta puntonan cu Bakmeyer ta para pe, pasobra nos pais, nos Aruba por.