Siman pasa partido POR a sinta cu SVB caminda a hiba conversacionnan den cual a concentra hopi riba e aspecto di pension. Segun lider di e partido Otmar Oduber esaki ta algo cu su colega Andin Bikker a trece dilanti na diferente ocasion den Parlamento. POR ta para pa flexibilidad di edad di pension, teniendo na cuenta circunstancianan laboral diferente di e ciudadanonan, como tambe e bienestar di e fondo. Contrario na e pensamento di Gobierno y algun miembronan di Parlamento cu no kier ni trata e posibilidad pa un alternativa pa loke ta edad di pension, POR ta para pa e calidad di bida di e ciudadano na prome luga y pues mester explora e posibilidadnan cu tin
Na e momentonan aki e suma cu cada ciudadano lo por cobra como pension di behez ta rond di mas o menos 1100 Florin, plus 100 Florin di reparatie toeslag, cu ta suma na mas o menos1200 Florin y rond di 1850 Florin pa un pareha. Sinembargo e averahe di e totalidad di personanan cu ta cobrando un Algemene Ouderdomsverzekering (AOV), na 2016, tabata rond di 600 Florin. Esaki kiermen cu a pesar cu ta papia di un pensioen di 1200 Florin, e averahe entre esnan cobrando pensioen den nos comunidad ta di 600 Florin, cual ta mitad di e suma, sr. Oduber a enfatisa. ‘Esaki ta un gran preocupacion y mester dune atencion, pasobra segun cifranan suministra pa SVB ta mustra cu 80 porciento di esnan cu pensioen ta depende solamente riba un pensioen di behez (AOV). Cu e cifranan aki conoci, ta mas cu claro cu e calidad di bida di nos pensionadonan ta den peliger.
Esaki kiermen cu nos pensionadonan no ta alcansa di tin un bida digno bou di e situacionnan cu nos tin actualmente. Ademas di esey a mira cu pa motibo di cu kier salvaguardia e fondo di pension, desicionnan a wordo tuma pa pusha esaki te na 65 aña den fase. A pesar di esaki, POR ta bisa cu mester por distingi den e calidad di bida cu un persona tabatin te na momento cu e yega na su edad di pension. ‘Nos sa cu na Aruba cu e clima cu nos ta biba den dje y tambe e tipo di trabou cu nos hendenan ta eherce, hopi biaha ta hacie hopi dificil pa un hende yega na un situacion sano te na e edad di 65. Pesey como partido nos a bisa cu nos si lo bin cu un oferta pa comunidad caminda lo tin e flexibilidad pa hende scoge si nan ta bay prome cu e edad di pension aki’, Oduber ta duna di conoce.
Cu e informacion ricibi, Partido POR lo bay presenta proximamente su puntonan di atencion y accion riba e tema di pension. C, sr. Oduber a termina bisando.